مبشر زیدی بی بی سی اردو ڈاٹ کام، کراچی

ڈی آئی جی آپریشنز فیاض لغاری کا کہنا ہے یہ ’ہائی الرٹ‘ امجد فاروقی کی ہلاکت کے بعد کسی ممکنہ دہشت گردی کی کارروائی کو روکنے کے لیے کیا گیا ہے۔

انہوں نے کہا کے اس سلسلے میں مسجدوں اور امام بارگاہوں پر سکیورٹی بڑھا دی گئی ہے اور ہوٹلوں اور سفارتخانوں کی نگرانی میں اضافہ کر دیا گیا ہے۔

قانون نافذ کرنے والے اداروں نے پیر کی صبح سکھر میں چھاپہ مار کر تین بھائیوں کو گرفتار کر لیا ہے۔ خالد انصاری، شاہد انصاری اور ساجد انصاری کو سکھر کے علاقے نصرت کالونی سے گرفتار کیا گیا ہے۔

خالد انصاری کے بارے میں حکام کا کہنا ہے کہ ان کا تعلق ایک شدت پسند تنظیم سے ہے۔ ان گرفتاریوں کا تعلق اتوار کو نواب شاہ میں ہونے والے آپریشن سے جوڑا جا رہا ہے۔

اس کے علاوہ سی آئی ڈی پولیس نے کالعدم تنظیم حرکت الجہاد الاسلامی کے ایک رکن منصور عرف ابراہیم چھوٹا کو بھی کراچی سے گرفتار کرنے کی تصدیق کی ہے۔