اعجاز مہر
بی بی سی اردو ڈاٹ کام،اسلام آباد |  |
|  شوکت عزیز دونوں نشتوں سے بھاری اکثریت سے کامیاب قرار پائیں ہیں |
پاکستان کے الیکشن کمیشن نے اٹک اور تھرپارکر کے ضمنی انتخابات میں حکمران جماعت مسلم لیگ کے امیدوار شوکت عزیز کی کامیابی کا باضابطہ نوٹیفکیشن جاری کردیا ہے اور وہ بطور رکن قومی اسمبلی جمعہ کی شام حلف اٹھا رہے ہیں۔ قانون کے مطابق رکن اسمبلی کے حلف سے قبل ایوان بالا سینیٹ کی رکنیت سے انہیں مستعفی ہونا ہے۔ چیف الیکشن کمشنر نے جمعہ کے روز ایک اخباری کانفرنس میں سرکاری نتائج کا اعلان کرتے ہوئے بتایا کہ حکمران جماعت مسلم لیگ کے امیدوار شوکت عزیز دونوں حلقوں سے کامبیاب ہوگئے ہیں۔ انہوں نے بتایا کہ صوبہ پنجاب کے ضلع اٹک کے قومی اسمبلی کے حلقہ 59 سے کل آٹھ امیدواروں نے انتخاب میں حصہ لیا، شوکت عزیز نے چھتر ہزار ایک سو چھپن ووٹ جبکہ حزب اختلاف کے امیدوار ڈاکٹر سکندر حیات نے انتیس ہزار چار سو ستانوے ووٹ حاصل کیے۔ جبکہ اس حلقے سے دیگر چھ امیدواروں کے حاصل کردہ جملہ ووٹ پندرہ سو کے لگ بھگ ہیں۔ صوبہ سندھ کے ضلع تھرپارکر کے حلقہ 229 سے شوکت عزیز نے ایک لاکھ چون ہزار سات سو پینسٹھ ووٹ حاصل کیے جبکہ حزب اختلاف کے امیدوار ڈاکٹر مہیش کمار ملانی نے دس ہزار سات سو بتیس ووٹ حاصل کیے۔ شوکت عزیز پر قوانین کے مطابق لازم ہوگا کہ وہ رکن اسمبلی کا حلف اٹھانے سے قبل ایوان بالا یعنی سینیٹ کی رکنیت سے مستعفی ہوجائیں۔یاد رہے کہ شوکت عزیز کو حکمران جماعت مسلم لیگ نے وزارت اعظمیٰ کے لیے نامزد کر رکھا ہے اور وہ آئندہ ہفتے بطور وزیراعظم ذمہ داریاں سنبھالیں گے۔ حزب اختلاف کا کہنا ہے کہ قانون کے مطابق شوکت عزیز جو کہ اس وقت سینیٹر اور وفاقی وزیر خزانہ ہیں جیسے ہی ایوان بالا سینیٹ کی نشست سے آج مستعفی ہوں گے اس کے ساتھ ہی وہ وزیر خزانہ بھی نہیں رہیں گے۔ دیکھنا یہ ہوگا کہ رکن اسمبلی کے طور پر حلف اٹھانے کے بعد وہ وزیر خزانہ کا دوبارہ حلف لیتے ہیں یا کہ وزارت خزانہ چند روز بغیر وزیر کے چلے گی۔ | 
یہ صفحہ دوست کو ای میل کیجیئے
پرِنٹ کریں
