عدنان عادل بی بی سی اردو ڈاٹ کام، لاہور

پولیس مقابلوں میں پولیس والے کم کم ہلاک اور زخمی ہوتے ہیں۔

پولیس کےمطابق نارووال سے بارہ کلومیٹر دور ایک گاؤں ڈیڑھ تلیض پور میں ڈکیتی، قتل اور اغواء برائے تاوان میں مطلوب ملزموں کا قلعہ احمد آباد تھانہ کی پولیس سے آمنا سامنا ہوگیا اور ان اشتہاری ملزموں نے گرفتاری کی مزاحمت کی تو تھانیدار نے مزید کمک طلب کی جس پر ضلعی پولیس آفیسر خود کچھ نفری کے ہمراہ وہاں پہنچ گئے۔

شام ساڑھے چار بجے ڈی پی او طیب سعید، تھانیدار محمد بوٹا اور ہیڈ کانسٹیبل محمد صدیق ملزموں کی فائرنگ سے شدید زخمی ہوگئے اور پولیس کے مطابق ان کے جسم میں سامنے کی طرف تین تین گولیاں لگیں۔

قائم مقام انسپکٹر جنرل پولیس اظہر حسن ندیم کےمطابق ان سب کو فورا لاہور کے میو ہسپتال میں لے جایا گیا لیکن ڈی پی او طیب سعید میو ہسپتال پہنچنے سے پہلے ہی دم توڑ گئے۔

پولیس کے مطابق ملزم گاؤں کے ایک مکان میں محصور تھے تاہم دو ملزم کی ہلاکت کے بعد رات گئے مقابلہ ختم ہو گیا۔

آخر تل مقابلے میں لاہور اور گوجرانوالہ سے ایلیٹ فورس بھی شامل ہو گئی تھی۔