پاکستان میں اب تک القاعدہ کے پانچ سو زائد ارکان گرفتار کیے جا چکے ہیں

خلفان غلانی پر کینیا میں 1998 میں امریکی سفارت خانے پر بم حملے میں ملوث ہونے کا الزام ہے۔ انہیں چند روز قبل گجرات سے ایک بڑے تصادم کے بعد گرفتار کیا گیا تھا اور حکومت نے اس کی تصدیق جمعرات کو کی تھی۔

گرفتار کیے گئے دو جنوبی افریقی باشندوں سے بھی تفتیش جاری ہے لیکن حکام اب تک نہ تو ان کی شناخت کرپائے ہیں اور نہ ہی یہ اندازہ لگایا جاسکا ہے کہ ان کا القاعدہ سے کس نوعیت کا تعلق ہے۔

پاکستان کے وزیر داخلہ فیصل صالح حیات نے جمعرات کو بی بی سی کو بتایا تھا کہ احمد خلفان غلانی کو گجرات میں ایک پولیس مقابلے کے بعد چودہ دیگر افراد کے ساتھ گرفتار کیا گیا تھا۔

انہوں نے کہا کہ ان چودہ افراد میں سےآٹھ غیر ملکی تھے جن میں احمد خلفان غلانی کے علاوہ دو جنوبی افریقہ سے تعلق رکھنے والے باشندے بھی شامل ہیں۔

انہوں نے کہا کہ امریکی حکومت نے احمد خلفان کے سر کی قیمت پچیس ملین ڈالر مقرر کی تھی۔

انہوں نے کہا کہ پاکستان کے خفیہ اداروں نے احمد خلفان اور ان کے ساتھیوں کا کھوج لگایا اور اب مزید تحقیقات کی جا رہی ہیں۔

احمد خلفان کو امریکہ کے حوالے کئے جانے کے بارے میں ایک سوال کا جواب دیتے ہوئے انہوں نےکہا کہ ابھی اس کا کوئی امکان نہیں۔ انہوں نے کہا کہ پاکستانی خفیہ ادارے جب تک اپنی تحقیقات مکمل نہیں کر لیتے ان کو امریکہ کے حوالے نہیں کیا جائے گا۔

گجرات سے ان کی گرفتاری کے بارے میں ایک سوال پر انہوں نے کہا کہ القاعدہ کے ارکان پاکستان کے مختلف شہروں میں چھپے ہوئے ہیں۔ انہوں نے یاد دلایا کہ خالد شیخ محمد کو بھی راولپنڈی سے گرفتار کیا گیا تھا۔

وزیر داخلہ نے کہا کہ پاکستان کے خفیہ ادارے تمام چھوٹے بڑے شہروں پر نظر رکھے ہوئے ہیں اور ایسے تمام عناصر کی کھوج لگانے کی کوشش کر رہے ہیں۔

گجرات میں القاعدہ کے سرکردہ ارکان کے علاوہ تین عورتیں اور بچے بھی گرفتار کیے گئے تھے۔ ان میں سے ایک عورت جس کا تعلق ازبکستان سے بتایا جاتاہے احمد خلفان غلانی کے عقد میں تھی۔

گزشتہ روز وزیر اعلی پنجاب میں گجرات میں ایک پولیس تھانے اور دو چوکیوں کے تمام عملے کو بظاہر اس واقعے کے سلسلے میں معطل کر دیا تھا۔