سعودی حکام نے دہشت گردی میں ملوث شدت پسندوں کو معافی کی پیشکش کی oi

اطلاعات کے مطابق خالد الحربی نے جن کو ابو سلیمان المکی کے نام سے بھی جانا جاتا ہے، سعودی حکومت کی معافی کے اعلان کے تحت خود کو حکام کے حوالے کیا ہے۔ اس اعلان کے بعد اب تک محض تین شدت پسندوں نے حکام کے سامنے ہتھیار ڈالے ہیں۔

سعودی عرب کی حکومت نے حال ہی میں ایک خصوصی اعلان کے ذریعے القاعدہ تنظیم کے شدت پسندوں کو اس شرط پر معافی کی پیشکش کی ہے کہ وہ ہتھیار ڈال کرخود کو حکام کے حوالے کردیں۔ معافی کی اس پیشکش کے ختم ہونے میں اب محض دس روز رہ گئے ہیں۔

سعودی حکام کے مطابق خالد الحربی مبینہ طور پر القاعدہ تنظیم کے سربراہ اسامہ بن لادن کے قریبی ساتھیوں میں سے سمجھے جاتے ہیں اور خیال ہے کہ وہ افغانستان میں اور بوزنیا میں جہاد میں شریک رہے ہیں۔

سعودی حکام نے بتایا کہ خالد الحربی ایران میں تھے اور آج ہی وہاں سے واپس آکر انہوں نے خود کو حکام کے حوالے کیا۔ تاہم ابھی تک یہ واضح نہیں ہے کہ ان کی واپسی میں ایرانی حکومت کا بھی کوئی کردار ہے یا نہیں۔

سعودی ٹیلی ویژن پر ان کو جہاز سے ایک وہیل چیئر پر سوار اپنی بیوی اور بیٹے کے ہمراہ اترتے دکھایا گیا۔