ہارون رشید
بی بی سی اردو ڈاٹ کام، پشاور |  |
|  وانا میں دو دن سے جھڑپیں جاری ہیں |
پاکستان کے قبائلی علاقے جنوبی وزیرستان میں حکام نے بتایا ہے کہ ایک فوجی ٹرک کے بارودی سرنگ سے ٹکرانے سے چھ فوجی زخمی ہوئے ہیں۔ جنوبی وزیرستان کے صدر مقام وانا کے مغرب میں اعظم ورسک کے علاقے کی جانب جانے والے ایک فوجی ٹرک کو یہ حادثہ پیر کی صبح تقریباً سات بجے کے قریب پیش آیا۔ ٹرک میں سوار چھ فوجی زخمی ہوئے ہیں جن میں سے دو کی حالت تشویشناک بتائی جاتی ہے۔ عینی شاہدین کے بقول دھماکے سے گاڑی کو بھی شدید نقصان پہنچا ہے۔ زخمیوں کو طبی امداد کے لئے ہیلی کاپٹر کے ذریعے نامعلوم مقام پر منتقل کیا گیا ہے۔ اس واقعہ کی ذمہ داری ابھی تک کسی نے قبول نہیں کی ہے۔ دوسری جانب وانا، شکئی اور اس کے آس پاس کے علاقوں میں فوجی چوکیوں سے القاعدہ کے مشتبہ افراد اور ان کے حامیوں کے ٹھکانوں پر آج دوسرے روز بھی وقفے وقفے سے گولے داغے جاتے رہے۔ تاہم ابھی تک کسی جانی نقصان کی اطلاع نہیں ملی ہے۔ حکام بھی اس بارے میں لب کشائی سے گریز کر رہے ہیں۔ ادھر پیر کو قبائلی علاقوں میں سیکیورٹی کے نگران محمود شاہ آج دیگر مقامی عمائدین کے ساتھ وادی شکئی میں فرنٹیئر کور کے فوجیوں کے ساتھ داخل ہوئے۔ ایک سرکاری بیان کے مطابق ان فوجیوں کا مقامی قبائل نے پرتپاک استقبال کیا۔ اس موقعہ پر چھ لاکھ روپے مالیت کی خوردنی اجناس بھی مقامی لوگوں میں تقسیم کی گئیں۔ یہ تقریب گزشتہ دنوں شکئی کی چار قوموں کی جانب سے حکومت کے ساتھ ایک معاہدے کے بعد منعقد ہوئی ہے۔ دریں اثناء حکام نے وانا میں گزشتہ فروری میں فوجی آپریشن کے دوران ہلاک ہونے والے عام شہریوں میں امدادی رقوم کی تقسیم شروع کر دی ہے۔ | 
یہ صفحہ دوست کو ای میل کیجیئے
پرِنٹ کریں
