اعجاز مہر بی بی سی اردو ڈاٹ کام، اسلام آباد

پاکستانی جیلوں میں گنجائش سے دوگنا افراد قید ہیں

یہ تفصیل نو جولائی کو وزارتِ داخلہ کی جانب سے پارلیمینٹ کے ایوان بالا یعنی سینیٹ میں پیپلز پارٹی کے سینیٹر فرحت اللہ بابر کے پوچھے گئے سوال پر تحریری طور پر پیش کی گئی تھی۔

صوبہ پنجاب کی جیلوں میں قید بچوں کی تعداد باقی تینوں صوبوں سے زیادہ یعنی 1648 ہے، جن میں سزائے موت کاٹنے والے چار بچے بھی شامل ہیں۔

سرکاری تفصیلات کے مطابق سزائے موت پانے والے سب سے زیادہ بچےصوبہ سرحد کی جیلوں میں قید ہیں اور ان کی تعداد سات ہے۔ یہاں دیگر جرائم کے تحت قید بچوں کی تعداد 313 ہے۔

سرکاری اعداد و شمار کے مطابق صوبہ سندھ میں کل691 بچے قید ہیں لیکن ان میں سزائے موت پانے والا کوئی بچہ نہیں ہے۔

جبکہ صوبہ بلوچستان میں سزائے موت پانے والے دو بچوں سمیت691 بچے قید میں ہیں۔

پاکستان کی کل ستر جیلوں میں تقریباً 35000 قیدیوں کی گنجائش ہے لیکن جیلوں میں موجود قیدیوں کی تعداد گنجائش کے دو گنا سے بھی زیادہ ہے یعنی پاکستانی جیلوں میں تقریباً 80000 افراد قید ہیں۔

وزارت داخلہ کے مطابق پاکستان کی جیلوں میں سزا یافتہ قیدی 25500 ہیں جبکہ زیر سماعت مقدمات میں قید رکھے جانے والے قیدیوں کی تعداد ان سے دگنی ہے۔