عدنان عادل بی بی سی اردو ڈاٹ کام ، لاہور

مخدوم امین فہیم کا کہنا ہے کہ اٹک سے متفقہ امیدوار نامزد کر دیا گیا ہے

پیپلز پارٹی کا یہ فیصلہ اتحاد برائے بحالی جمہوریت کی طرف سے گزشتہ روز کیے گئے اس اعلان کے بعد آیا ہے کہ اٹک سے اتحاد کا متفقہ امیدوار ہوگا جس کا اعلان چند روز میں کیا جائے گا۔

پیپلز پارٹی پنجاب کے ترجمان نوید چودھری نے بی بی سی کو بتایا کہ پیپلز پارٹی پنجاب کی طرف سے ڈاکٹر سکندر حیات کو قومی اسمبلی کا امیدوار بنانے کی سفارش کی گئی تھی جس کی پارٹی کی سربراہ بے نظیر بھٹو نے منظوری دے دی ہے۔

ترجمان نے کہا کہ پارٹی کی جانب سے چار لوگوں نے کاغذات نامزدگی جمع کرائے تھے اور اب باقی تین لوگ بیس جولائی سے پہلے اپنے کاغذات واپس لے لیں گے۔ ان تین افراد میں چودھری غلام عباس ، نوید چودھری اور راجہ اشرف پرویز شامل ہیں۔

ڈاکٹر سکندر حیات کا تعلق حسن ابدال سے ہے اور اکتوبر سنہ دو ہزار دو کے عام انتخابات میں انھوں نے چالیس ہزار سے زیادہ ووٹ لے کر دوسری پوزیشن حاصل کی تھی۔

گو اتحاد برائے بحالی جمہوریت کے چیئرمین مخدوم امین فہیم کا کہنا ہے کہ اتحاد اٹک سے متفقہ امیدوار نامزد کر دے گا لیکن اتحاد کی دو بڑی جماعتوں پاکستان مسلم لیگ (ن) اور پیپلز پارٹی کے بیچ اس معاملہ پر اختلافات ہونے کی خبریں گردش کرتی رہی ہیں۔