اعجاز مہر بی بی سی اردو ڈاٹ کام، اسلام آباد

شجاعت حسین قومی اسمبلی میں

چودھری شجاعت حسین کو قائد ایوان بنانے کے حق میں منگل کے روز 190 اراکین نے ووٹ دیے تھے لیکن اعتماد کے ووٹ کے دوران انہیں ایک ووٹ کم ملا۔

ووٹ کے بعد چودھری شجاعت نے سرکار کے حامی اراکین کا شکریہ ادا کرتے ہوئے دعویٰ کیا کہ آج سے نئے دور کا آغاز ہو چکا ہے۔ وہ کہہ رہے تھے کہ ان کا شروع سے فلسفہ ہے کہ ’ جیو اور جینے دو‘ ، اور وہ اس پر ہی عمل پیرا رہیں گے۔
وزیراعظم کا کہنا تھا کہ ’صدر مشرف کی بھارت سے مذاکرات کی پالیسی کو آگے بڑھاتے ہوئے امن کی طرف پیش قدمی کرتے رہیں گے ،۔

نئے وزیراعظم نے ایوان سے درخواست کی کہ معاشرے سے جھوٹ اور الزام تراشی کے خاتمے کے لئے قانون سازی کی جائے۔ تاہم انہوں نے ساتھ ہی کہہ دیا کہ وہ وزارت قانون کو ہدایت کرتے ہیں کہ ایسا قانون بنائے جس میں جھوٹ بولنے اور الزام تراشی کرنے والے کو سخت سزا دی جا سکے۔

انہوں نے صدر مشرف کی کئی مرتبہ تعریف کی جبکہ ان کے بقول ملک میں اقتصادی ترقی پر انہوں نے وزیر خزانہ اور مستقبل کے وزیراعظم شوکت عزیز کی بھی تعریف کی۔

قبل ازیں ایوان صدر میں صدر جنرل پرویز مشرف نے ان سے حلف لیا تھا ۔حلف برداری کی تقریب میں سابق وزیراعظم ظفراللہ جمالی، چاروں صوبوں کے وزراء اعلیٰ ، پارلیمینٹرینز ، مسلح افواج کے سربراہان اور سینیئر سول و فوجی افسران بھی موجود تھے۔

ایوان صدر میں وزیراعظم کے حلف کے بعد ستائیس رکنی کابینہ نے بھی حلف اٹھایا۔ جس میں بیس وفاقی اور سات مملکتی وزراء شامل ہیں۔