اعجاز مہر بی بی سی اردو ڈاٹ کام، اسلام آباد

مخدوم اے آر ڈی کے متفقہ امیدوار ہیں

تاہم انہوں نے چوہدری شجاعت کے کاغذات نامزدگی پر پاکستان پیپلز پارٹی کا اعتراض مسترد کر دیا ہے۔

پیر کی صبح مسلم لیگ اور ان کے اتحادیوں کی جانب سے چوہدری شجاعت حسین جبکہ اتحاد برائے بحالی جمہوریت یعنی اے آر ڈی کے متفقہ امیدوار کے طور پر مخدوم امین فہیم نے کاغذات نامزدگی داخل کرائے تھے۔

پیپلز پارٹی کی جانب سے چودھری شجاعت

قومی اسمبلی میں حزب اقتدار اور حزب اختلاف کی تعداد قومی اسمبلی کی کل نشستین 342 موجود اراکین کی تعداد 340 حکمران اتحاد 193 حزب اختلاف 147 قومی اسمبلی کی کل نشستین 342

ان کا کہنا تھا کہ پاکستان کے قوانین کے مطابق کوئی شخص اپنے یا بیوی کے نام پر لیا گیا بیس لاکھ روپے یا اس سے زائد کا قرضہ معاف کرانے یا ڈیفالٹ کرنے کی صورت میں رکن اسمبلی کا اہل نہیں ہوتا، لہٰذا انہیں نا اہل قرار دیا جائے ۔

قومی اسمبلی کے اسپیکر چودھری امیر حسین نے ان کا یہ اعتراض مسترد کرتے ہوئے حکم دیا کہ قانون کے مطابق کوئی بھی رکن اسمبلی قائد ایوان کے لیے کاغذات نامزدگی داخل کرا سکتا ہے۔

قومی اسمبلی کے سیکریٹری محمود سلیم محمود کے مطابق قائد ایوان کے لئے دو امیدواروں چوہدری شجاعت حسین اور مخدوم امین فہیم کے درمیان مقابلہ ہوگا اور منگل کی شام کو طلب کردہ قومی اسمبلی کے خصوصی اجلاس میں انتخاب ہوگا۔

پیر کی صبح اے آر ڈی کی پارلیمانی پارٹی کا اجلاس ہوا جس میں مسلم لیگ نواز نے جاوید ہاشمی کا نام واپس لے لیا اور اتفاق رائے سے مخدوم امین فہیم کے نام کی منظوری دے دی۔

حزب اختلاف کے ایک اور اتحاد متحدہ مجلس عمل کے رہنما قاضی حسین احمد نے مخدوم امین فہیم کی مشروط حمایت کرنے کا اعلان کیا ہے۔

ان کا کہنا تھا کہ اگر پیپلز پارٹی قومی اسمبلی میں مولانا فضل الرحمٰن کو قائد حزب اختلاف تسلیم کرلے اور حدود آرڈیننس میں ترامیم کا بل واپس لے تو مجلس عمل امین فہیم کو ووٹ دینے کے لیے تیار ہے۔

پاکستان پیپلز پارٹی نے قاضی حسین احمد کی مشروط پیشکش مسترد کردی ہے۔
اس ضمن میں رابطہ کرنے پر سید نوید قمر نے الزام لگایا کہ متحدہ مجلس عمل ’ملا ملٹری اتحاد‘ کا حصہ ہے اور ان کے بقول جنرل مشرف کی بی ٹیم ہے اس لئے ان سے اتحاد کی انہیں کوئی ضرورت نہیں۔

ادھر متحدہ مسلم لیگ کے رہنما چوہدری شجاعت حسین نے اخباری کانفرنس میں بتایا کہ وہ تمام اتحادیوں کے شکر گزار ہیں کہ انہوں نے ان کی نامزدگی کی حمایت کی۔ ان کا دعویٰ تھا کہ کسی ایک بھی رکن نے ان کی مخالفت نہیں کی ہے۔

ایک سوال کے جواب میں چوہدری شجاعت کا کہنا تھا کہ تمام اتحادیوں نے انہیں مشورہ دیا ہے کہ جو کابینہ مستعفی ہونے والے وزیراعظم ظفراللہ جمالی نے تحلیل کی تھی وہ ہی برقرار رکھی جائے اور وہ اس تجویز پر سنجیدگی سے غور کر رہے ہیں اور مشاورت کے بعد ہی فیصلہ کریں گے۔

تاہم ان کے مخالفین کا دعویٰ ہے کہ چوہدری شجاعت حسین نے ایسی بات محض اتحادیوں سے ووٹ حاصل کرنے کے لیے کی ہے ۔

انہوں نے اخبار نویسوں سے کہا کہ انہیں عارضی یا نگران وزیراعظم نہ لکھا جائے بلکہ صرف اور صرف وزیراعظم لکھا اور پکارا جائے۔

جب ان سے پوچھا گیا کہ کیا انہوں نے مستقل وزیراعظم رہنے کا ارادہ کر لیا ہے؟ ان کا جواب تھا کہ ’ہرگز نہیں‘ اور ان کے بقول جیسے ہی شوکت عزیز رکن اسمبلی منتخب ہوجائیں گے تو وزارت اعظمیٰ انہیں سونپ دیں گے۔

اس موقع پر شوکت عزیز بھی موجود تھے اور چوہدری شجاعت حسین نے بتایا کہ انہیں رکن اسمبلی بنانے کے لیے فاٹا اور چاروں صوبوں سے پارٹی کے بیشتر اراکین اسمبلی نے نشستیں خالی کرنے کی پیشکش کی ہے اور وہ ابھی اس پر غور کر رہے ہیں کہ کس صوبے سے وہ ضمنی انتخاب میں حصہ لیں۔

متحدہ مسلم لیگ کے امیدوار نے بتایا کہ صدر جنرل پرویز مشرف نے ان کے حامی تمام اراکین اسمبلی سے مشاورت کے بعد وزیراعظم ظفراللہ جمالی کی جگہ ان کا ( چودھری شجاعت ) نام تجویز کیا جو کہ ان کے لئے تعجب کی بات ہے۔

جب ان سے بی بی سی نے دریافت کیا کہ صدر مملکت کو مسلم لیگ کے معاملات کا فیصلہ کرنے کا اختیار کس قانون کے تحت حاصل ہے تو انہوں نے کہا کہ صدر مملکت پارلیمینٹ کا حصہ ہیں اور وہ مسلم لیگ کو مشورہ دے سکتے ہیں۔