اعجاز مہر بی بی سی اردو ڈاٹ کام، اسلام آباد

آصف زرداری اس سے پہلے اس نوعیت کی کئی پیش کشوں کو مسترد کر چکے ہیں

سوئیز تحقیقاتی میجسٹریٹ کرسٹائن جونوڈ Junod Ms.Christine کے دستخط سے جاری کردہ نوٹس میں بینظیر بھٹو اور ان کے شوہر آصف علی زرداری کو تیس جون کو جنیوا میں ان کے سامنے پیش ہونے کا کہا گیا ہے۔

یہ نوٹس اسلام آباد کے ڈپٹی کمشنر نے تئیس جون کی شام کو پمزہسپتال جہاں زرداری کو سب جیل قرار دے کر رکھا گیا ہے، وہاں ملاقات کرکے وصول کرایا۔

پیپلز پارٹی کے ترجمان فرحت اللہ بابر نے رابطہ کرنے پر بی بی سی اردو ڈاٹ کام کو بتایا کہ بینظیر بھٹو جو جلاوطن ہیں وہ ان کے وکلاء سے مشورے کر رہی ہیں اور ابھی انہوں نے پیش ہونے یا نہ ہونے کے بارے میں کوئی فیصلہ نہیں کیا۔

البتہ بابر کے مطابق آصف علی زرداری کو عدالت کے حکم پر سرکاری ڈاکٹروں پر مشتمل ایک طبی بورڈ نے طویل سفر کرنے سے منع کر رکھا ہے اور تیس جون کو لاہور کی سیشن کورٹ نے بھی زرداری کو طلب کر رکھا ہے اس لئے وہ جنیوا نہیں جا سکتے۔

یاد رہے کہ زرداری کو سوئس میجسٹریٹ نے اس سے پہلے بائیس اپریل کو پیش ہونے کے لئے نوٹس بھیجا تھا اور اس وقت بھی انہوں نے ناسازی طبیعت کی بنا پر پیش ہونے سے معذرت ظاہر کرتے ہوئے سماعت ملتوی کرنے کی درخواست کی تھی۔

بائیس اپریل کو جنیوا میں پیش ہونے کے لئے وفاقی وزیر اطلاعات شیخ رشید نے حکومت کی جانب سے ان کو چارٹرڈ طیارے کے ذریعے لےجانے اور واپس لانے کی پیشکش کی تھی، جو زرداری نے مسترد کردی تھی ۔

واضح رہے کہ بینظیر بھٹو اور ان کے شوہر کو سوئیزر لینڈ کے تحقیقاتی میجسٹریٹ نے اگست دوہزار تین میں مبینہ طور پر کالا دھن سفید کرنے کا الزام عائد کرتے ہوئے چھ ماہ کی معطل سزا اور پچاس پچاس ہزار ڈالر جرمانہ کیا تھا جبکہ انہیں بیس لاکھ ڈالر سے زائد رقم حکوممت پاکستان کو ادا کرنے کا بھی حکم دیا تھا۔

سوئس میجسٹریٹ کے اس حکم کے خلاف بینظیر اور ان کے شوہر نے سوئٹزلینڈ کے اٹارنی جنرل کو اپیل کی تھی۔ جس پر اٹارنی جنرل نے اپیل پر دوبارہ تحقیقات کا حکم جاری کیا تھا اور اس سلسلے میں انہیں اب یہ نوٹس موصول ہوا ہے۔