علی سلمان لاہور

پیپلز پارٹی کے ترجمان فرحت اللہ بابر نے یہ بیان آصف علی زرداری کو سوئٹزرلینڈ بھجوائے جانے کی حکومتی اجازت کے اعلان کے بعد رات گئے جاری کیا۔ ترجمان کے مطابق پیپلز پارٹی نے حکومت سے مطالبہ کیا ہے کہ وہ سوئس عدالت کو اس بات سے آگاہ کریں کہ آصف علی زرداری فی الحال سفر کے قابل نہیں ہیں اور ان حالات میں وہ سوئٹزرلینڈ نہیں جاسکتے۔

ترجمان نے کہا کہ آصف علی زرداری پہلے ہی زیر علاج ہیں اور میڈیکل بورڈ دو بار ان کی معائنہ کرنے کے بعد انہیں آٹھ ہفتہ کے آرام کا مشورہ دے چکا ہے جس کی بنیاد پر عدالت نے ان کے مقدمات کی سماعت بھی ملتوی کر رکھی ہے کیونکہ اس سے قبل مخلف مقدمات کی سماعت کے لیے آصف علی زرداری کو اوپر تلے کراچی لاہور اور اسلام آباد کے سفر کرنے پڑے تھے۔

ترجمان نے کہا کہ پاکستانی حکام اس بات سے آگاہ تھے کہ آصف علی زرداری اس وقت سفر کرنے کے قابل نہیں ہیں اسی لیے انہوں نے جان بوجھ کر اس موقع پر انہیں بیرون ملک بھجوانے کی پیشکش کر دی ہے۔

ترجمان نے الزام لگایا کہ پاکستان ٹیلی ویژن کے ذریعے حکومت نے یہ جھوٹا تاثر دینے کی کوشش کی کہ شاید انہیں رہا کیا جا رہا ہے ۔حالانکہ ایسا نہیں تھا۔
انہوں نے کہا کہ ٹی وی پر اس اعلان کے بعد حکومتی نمائندوں نے جیل میں آصف علی زرداری سے ملاقات کی اور انہیں مطلع کیا کہ حکام انہیں پاکستان کی جیل سے سوئٹزر لینڈ کی جیل میں منتقل کرنے کے لیے تیار ہیں۔