اعجاز مہر بی بی سی اردو ڈاٹ کام‘ اسلام آباد

سلامتی کونسل کے قیام کا بل سینیٹ میں پیش کیا جانے والا ہے جس کا اجلاس سنیچر کو ہو رہا ہے

اب یہ بل ایوان بالا سینٹ میں بھیجا جائے گا اور سینیٹ کی منظوری کے بعد جب صدر مملکت بل پر دستخط کریں گے تو کونسل قائم ہو جائے گی۔

حکومت کی جانب سے منظور کرائے گئے اس بل کی کل نو شقیں ہیں۔ جن کے مطابق یہ کونسل قومی سلامتی کے امور بشمول اقتدار اعلیٰ، دفاع، ریاست کے تحفظ اور بحران سے نمٹنے کے لئے مشاورتی فورم کا کام کرے گی۔

بل کے متن کے مطابق تیرہ رکنی سلامتی کونسل کا سربراہ صدر ہوگا جبکہ ارکان میں وزیراعظم، چئرمن سینٹ، قومی اسمبلی کا سپیکر اور حزب اختلاف کا رہنما، چاروں صوبائی وزراء اعلی، چئیرمین جوائنٹ چیفس آف سٹاف کمیٹی، بری، بحری اور فضائیہ کے سربراہان بھی کونسل کے ارکان ہوں گے۔
کونسل کا اجلاس صدر اپنی صوابدید پر یا وزیر اعظم کے مشورے سے بلا سکتے ہیں۔ کونسل کے اجلاس میں کسی بھی شخص کو خصوصی دعوت پر بلایا جا سکتا ہے۔

کونسل کا طلب کردہ اجلاس دو یا زائد ارکان کی عدم موجودگی کی بنا پر ملتوی نہیں کیا جاسکے گا۔

حزب اختلاف کے کئی ارکان نے اس نقطے پر شدید اعتراضات کرتے ہوئے کہا تھا کہ اس کا مطلب یہ ہوا کہ اگر تمام سویلن ارکان اجلاس میں نہ بھی آئیں تو فوجی خود ہی فیصلہ کردیں گے۔

بدھ کی شام جب اجلاس شروع ہوا تو حزب اختلاف کے تمام ارکان نے کہا کہ عمران خان کو ذاتی نقطہ وضاحت پر بات کرنے دی جائے، جب سپیکر نے اجازت نہ دی تو انہوں نے کاروائی میں حصہ نہ لیا۔

صبح کے سیشن میں عمران خان اور چودھری شجاعت میں جنرل مشرف پر تنقید کے سوال پر جھڑپ ہوئی تھی۔

عمران خان نے کہا کہ ’احتساب بیورو میں شجاعت کی کئی فائلیں کھلی ہوئی ہیں اور وہ کروڑوں کا قرضہ بھی کھا گیا ہے اس لئے جنرل کی خوشامد کر رہا ہے۔‘

جس پر شجاعت نے کہا کہ کل تک عمران خان جنرل کی تعریفیں کرتے نہیں تھکتا تھا اور خود کو وزیر اعظم بنانے کی لئے منتیں کرتا تھا آج وہ کس منہ سے تنقید کرتے ہیں۔

بعد میں جب عمران کو دوبارہ موقعہ نہ ملا تو حزب اختلاف کے ارکان نعرے بازی کرتے ہوئے نشستیں چھوڑ کر روسٹرم کے پاس سپیکر کے سامنے احتجاج کرنے لگے تو سپیکر نے عجلت میں بل منظوری کے لئے پیش کیا جو آواز کی ووٹ کے ذریعے منظور کیا گیا۔

بعد میں خزب اختلاف کی تمام جماعتوں کے سرکردہ رہنماؤں نے کیفے ٹیریا میں پریس کانفنس کے دوران حکومت پر الزام لگایا کہ قانون اور قواعد و ضوابط کی سنگین خلاف ورزی کرتے ہوئے بل منظور کرایا گیا ہے۔

وزیر اطلاعات شیخ رشید نے عجلت میں بل منظور کرنے کے سوال پر کہا کہ حزب اختلاف کے غیرذمہ دارانہ رویے کی وجہ سے ان کو ایسے کرنا پڑا کیوں کہ بقول ان کے حزب اختلاف غیر سنجیدہ تھی۔

قومی اسمبلی کا اجلاس اب جمعرات کی صبح تک ملتوی کردیا گیا ہے۔