ہارون رشید بی بی سی اردو ڈاٹ کام پشاور

علاقے میں حکومت کی جانب سے قبائلیوں کے نام دستی اشتہارات (پمفلٹس) کی تقسیم کے جواب میں نامعلوم افراد نے فوجیوں کے نام ہفتے کے روز ایک بیان جاری کیا ہے جس میں انہیں امریکہ کے اشارے پر ان کے خلاف لڑنے سے منع کیا ہے۔

وانا اور اس کے گرد و نواح میں ہیلی کاپٹروں اور لوگوں کے ذریعے جمعہ کے روز دستی اشتہارات تقسیم کرنے کا عمل شروع کیا گیا تھا۔

اردو زبان میں لکھے اس ایک صفحے کے پیغام میں ان مقامی قبائلیوں سے اپیل کی گئی تھی وہ غیرملکیوں کو اپنا علاقہ چھوڑ دینے یا ہتھیار ڈالنے پر مجبور کریں۔ بیان میں مزید کہا گیا تھا کہ یہ غیرملکی مہمان نوازی کی قبائلی روایت کا غلط فائدہ اٹھا رہے ہیں۔

اس کے جواب میں ہفتے کو نامعلوم افراد یا تنظیم نے قبائل وزیرستان کے نام ایک بیان جاری کیا ہے۔ اردو میں لکھے اس جوابی بیان کا عنوان ’فوجیوں کو پیغام، ہے۔ اس تفصیلی بیان میں فوجیوں کو مخاطب کر کے کہا گیا ہے کہ ’وہ بھی مسلمان ہیں اور ہم بھی پھر امریکہ کے اشاروں پر وہ ایک دوسرے کو کیوں قتل کر رہے ہیں‘۔

بیان میں اس بات کا دعویٰ کیا گیا ہے کہ دنیا کے تمام علماء اس بات پر متفق ہیں کہ امریکہ کے اتحادیوں کو ہلاک کرنا عین جہاد ہے اور ان کے مقابلے میں مارے جانے والے شہید ہیں۔

بظاہر القاعدہ کے حامیوں کی جانب سے کمپیوٹر کی مدد سے لکھے گئے اس بیان میں دھمکی دی گئی ہے کہ فوج ان پر دوبارہ حملے کی لئے آسکتی ہے جس کے لئے وہ پوری طرح تیار ہیں۔

جنوبی وزیرستان کے بعد اطلاعات ہیں کہ حکام نے شمالی وزیرستان میں بھی مقامی قبائل کو چھ روز کے اندر وہاں ایک فوجی افسر اور ایک سپاہی کے قاتلوں کو حوالے کرنے کا حکم دیا ہے۔

یہ فوجی شوال کے دور افتادہ علاقے میں ایک کیمپ پر حملے میں ہلاک ہوئے تھے۔ اس واقعہ میں تین فوجی زخمی بھی ہوئے تھے۔

گزشتہ دنوں وانا آپریشن کے دوران افغان سرحد کے قریب قبائلی علاقوں میں کئی مقامات پر پاکستانی سرکاری اہداف پر حملے ہوئے تھے جن میں بڑا فوجی جانی نقصان بھی اٹھانا پڑا۔

قبائلی روایات کے تحت اب جنوبی کے بعد شمالی وزیرستان میں بھی مقامی انتظامیہ نے اجتماعی ذمہ داری کے قانون کے تحت قبائل سے حملہ آوروں کی برآمدگی کا مطالبہ کیا ہے۔

شمالی وزیرستان میں ایک جرگہ میں مقامی انتظامیہ نے افغان سرحد کے قریب پہاڑی علاقے شوال میں بسنے والے قبائل جانی خیل، بکا خیل اور کابل خیل سے فوجی کیمپ پر حملے میں ملوث افراد کا مطالبہ کیا ہے۔ اس مقصد کے لئے ان قبائل کو چھ روز کا وقت دیا گیا ہے۔

انیس مارچ کو شوال کیمپ پر حملے میں ایک فوجی میجر عبدالوحید اور سپاہی موسیٰ ہلاک جبکہ تین زخمی ہوئے تھے۔ اس مہلت کے خاتمے پر توقع ہے کہ دوبارہ مذاکرات کئے جائیں گے۔

ادھر شمالی وزیرستان میں بھی بڑھتی ہوئی فوجی نقل و حرکت سے عوام میں تشویش پیدا ہوئی ہے۔