پاکستان میں زلزلے سے 25 ہزار سے زائد مکانات تباہ
،تصویر کا ذریعہAFP
پاکستان کے قدرتی آفات سے نمٹنے کے ادارے این ڈی ایم اے کے مطابق گذشتہ پیر کو آنے والے شدید زلزلے کے نتیجے میں ملک بھر میں 25 ہزار سے زائد مکانات کو نقصان پہنچا ہے۔
این ڈی ایم اے کے تازہ اعداد وشمار کے مطابق کل 25367 مکانات مکمل یا جزوی طور پر تباہ ہوئے ہیں۔
پیر کو آنے والے7.5 شدت کے اس زلزلے میں ہونے والی ہلاکتوں کی مجموعی تعداد 272 ہے جبکہ 2152 افراد زخمی ہوئے ہیں۔
زلزلے سے سب سے زیادہ متاثر ہونے والے صوبے خیبر پختونخوا میں 15692 مکانات اور 155 سکولوں کو نقصان پہنچا ہے جبکہ صوبے میں ہلاکتوں کی کل تعداد 255 ہے۔ صوبہ خیبر پختونخوا میں 1802 افراد زخمی ہوئے ہیں۔
این ڈی ایم اے کے مطابق خیبر پختونخوا میں سے سے زیادہ مکانات سوات میں تباہ ہوئے ہیں جن کی تعداد 3681 ہے۔سب سے زیادہ ہلاکتیں ضلع شانگلہ میں ہوئیں جہاں 50 افراد ہلاک ہوئے۔
End of سب سے زیادہ پڑھی جانے والی
چترال سے 32 ہلاکتوں کی تصدیق ہوئی ہے تاہم وہاں کی مقامی انتظامیہ کا کہنا ہے کہ ہلاک ہونے والوں کی تعداد 37 ہے اور متعدد کچی بستیاں مکمل طور پر منہدم ہو چکی ہیں۔
قبائلی علاقے فاٹا میں بھی تباہی ہوئی ہے جہاں ہلاکتوں کی تعداد 30 ہوگئی ہے۔ سب سے زیادہ باجوڑ ایجنسی متاثر ہوئی جہاں 23 ہلاکتیں ہوئیں اور 8120 مکانات تباہ ہوئے۔
پی ڈی ایم اے کے مطابق کل 155 تعلیمی اداروں کی تباہی کیاطلاعات ہیں۔
گلگت بلتستان میں تباہ ہونے والے مکانات کی کل تعداد 413 ہے۔ سب سے زیادہ مکانات غضر میں تباہ ہوئے ہیں جن کی تعداد 250 ہے۔
دوسری جانب پنجاب میں بھی زلزلے سے مکانات کو نقصان پہنچا ہے جہاں تباہ ہونے والے مکانات کی کل تعداد 61 ہے جبکہ پانچ افراد ہلاک ہوئے ہیں۔ راولپنڈی میں سب سے زیادہ مکانات کو نقصان پہنچا ہے۔
