زلزلے سے ہلاکتیں 260 سے زیادہ، متاثرین کے لیے امداد کا اعلان
پاکستان کے قدرتی آفات سے نمٹنے کے ادارے این ڈی ایم اے کے مطابق پیر کو آنے والے شدید زلزلے کے نتیجے میں ملک بھر میں ہونے والی ہلاکتوں کی مجموعی تعداد 267 تک پہنچ چکی ہے۔
اس زلزلے سے 1856 افراد زخمی ہوئے ہیں جبکہ بڑے پیمانے پر مالی نقصان بھی ہوا ہے۔
زلزلے سے خیبر پختونخوا کا صوبہ سب سے زیادہ متاثر ہوا ہے جہاں اب تک ہلاک ہونے والے افراد کی تعداد 220 ہوگئی ہے۔ حکام نے بتایا ہے کہ سب سے زیادہ ہلاکتیں وادی سوات کے ضلع شانگلہ میں ہوئیں جہاں 49 افراد ہلاک ہوئے۔
چترال سے 32 ہلاکتوں کی تصدیق ہوئی ہے تاہم وہاں کی مقامی انتظامیہ کا کہنا ہے کہ ہلاک ہونے والوں کی تعداد 37 ہے اور متعدد کچی بستیاں مکمل طور پر منہدم ہو چکی ہے۔
قبائلی علاقے فاٹا میں بھی تباہی ہوئی ہے جہاں ہلاکتوں کی تعداد 30 سے تجاوز کر چکی ہے۔ سب سے زیادہ باجوڑ ایجنسی متاثر ہوئی جہاں 21 ہلاکتیں ہوئی اور 300 سے زیادہ مکانات تباہ ہوئے۔
End of سب سے زیادہ پڑھی جانے والی
پاکستان کے وزیراعظم میاں محمد نواز شریف نے جو خیبر پختونخوا کے مختلف علاقوں کے دورے پر ہیں، بدھ کو پشاور میں زلزلے کے بعد جاری امدادی کارروائیوں کا جائزہ لینے کے بعد زلزلہ متاثرین کے لیے مالی امداد کا اعلان کیا ہے۔
نواز شریف کے مطابق ہلاک شدگان کے اہلِ خانہ کو چھ، چھ لاکھ ، زخمیوں کے لیے ایک، ایک لاکھ فی کس اور معذوروں کو دو، دو لاکھ روپے فی کس دیے جائیں گے۔
دوسرے جانب پی ڈی ایم اے کی جانب سے اب تک سامنے آنے والے اعدادوشمار میں صرف چار اضلاع کے تعلیمی اداروں کو پہنچنے والے نقصان کے اعدادوشمار سامنے آئے ہیں۔
پی ڈی ایم کے اہلکار یوسف ضیاء نے بی بی سی اردو کی حمیرا کنول کو بتایا کہ اب تک کل 147 تعلیمی اداروں کی تباہی کی خبر موصول ہوئی ہے تاہم ابھی دیگر علاقوں سے مزید اعداوشمار موصول ہو رہے ہیں۔
انھوں نے بتایا کہ سب سے زیادہ تعلیمی ادارے ضلع ٹانک میں متاثر ہوئے جن کی تعداد 53 ہے جبکہ اپر دیر میں 45 سکول تباہ ہوئے۔
لکی مروت میں تباہ ہونے والے سکولوں کی تعداد 34 ہے۔
بنوں میں کوئی ہلاکت نہیں ہوئی اور نہ ہی کسی مکان کو نقصان پہنچنے کی اطلاع سامنے آئی ہے تاہم وہاں بھی 15 سکول زلزلے سے متاثر ہوئے ہیں۔
مجموعی طور پر 8450 مکانات تباہ ہوئے جبکہ 113 سکول بھی زلزلے سے متاثرہ عمارتوں میں شامل ہیں۔
سب سے زیادہ مکانات سوات اور لوئر دیر میں تباہ ہوئے جن کی تعداد بالترتیب 2203 اور 23087 بتائی گئی ہے۔
