عوامی نیشنل پارٹی کے رہنما سے کئی کلو سونا برآمد

پاکستان کے قومی احتساب بیورو یعنی نیب نے عوامی نیشنل پارٹی کے رہنما اور سابق دور حکومت میں وزیر اعلیٰ خیبر پختونخوا کے سپیشل اسسٹنٹ سید معصوم شاہ سے کئی کلو سونا برآمد کیا ہے۔

قومی احتساب بیورو کی جانب سے جاری ہونے والے بیان میں کہا گیا ہے کہ سید معصوم شاہ کی نشاندہی پر نیب نے خفیہ مقام سے سونا برآمد کیا ہے جس کا وزن کئی کلو ہے۔

اس بیان میں یہ نہیں بتایا گیا کہ کتنے کلو سونا برآمد کیا گیا ہے تاہم اتنا بتایا گیا ہے کہ یہ سونے کے چھوٹے بلاکس کی شکل میں ہے۔

نیب کے مطابق سید معصوم شاہ کو مالی بد عنوانی اور اپنی آمدنی سے زیادہ وسائل رکھنے کے الزام میں رواں ماہ کی 11 تاریخ کوگرفتار کیا گیا تھا۔

سید معصوم شاہ ان دنوں نیب کی تحویل میں ریمانڈ پر ہیں۔

بیان میں کہا گیا ہے کہ سید معصوم شاہ کے پاس اس سونے اور نقدی کے علاوہ قیمتی جائیداد بھی ہے۔

جائیداد کی اس فہرست میں ضلع بٹگرام میں 12 کنال پر مشتمل مکان اور حجرے کے علاوہ پشاور، راولپنڈی اور کراچی میں کئی پلاٹ اور مکانات ان کی ملکیت میں ہیں۔

سید معصوم شاہ گذشتہ دور حکومت میں عوامی نیشنل پارٹی کے وزیر اعلیٰ امیر حیدر خان ہوتی کے خصوصی نائب تھے اور ان پر الزام تھا کہ وہ مالی بدعنوانی میں ملوث رہے ہیں۔

واضح رہے کہ نیب نے گذشتہ ماہ خیبر پختونخوا کے محکمہ معدنیات کے اہم افسران کو بھی گرفتار کیا تھا جبکہ صوبائی احتساب کمیشن نے بھی اس بارے میں اہم گرفتاریاں کر رکھی ہیں۔

ان میں پاکستان تحریک انصاف کے وزیر معدنیات ضیاء اللہ آفریدی بھی شامل ہیں۔