’شکیل آفریدی کی سزا بغیر کسی جرم کے بڑھتی جا رہی ہے‘
،تصویر کا ذریعہAFP
القاعدہ کے سربراہ اسامہ بن لادن کی گرفتاری میں مبینہ طور پر امریکہ کی مدد کرنے والے پاکستانی ڈاکٹر شکیل آفریدی کے وکیل نے کہا ہے کہ فاٹا ٹربیونل دوبارہ تشکیل نہ دیے جانے سے ان کے موکل کی سزا بغیر کسی جرم کے بڑھتی جا رہی ہے۔
ڈاکٹر شکیل آفریدی کے وکیل قمر ندیم آفریدی ایڈوکیٹ نے بی بی سی کو بتایا کہ فاٹا ٹربیونل کی مدت جنوری 2015 کے آخر میں ختم ہوچکی ہے لیکن ابھی تک نیا بینچ تشکیل نہیں دیا جاسکا ہے۔
فاٹا ٹربیونل کو قبائلی علاقوں میں سپریم کورٹ کا درجہ حاصل ہے جہاں پر ان تمام فیصلوں کے خلاف اپیل کی جاتی ہے جو ماتحت عدالتوں یعنی پولیٹکل ایجنٹ یا کمشنر کی عدالتوں سے دی جاتی ہے۔
یہ امر بھی اہم ہے کہ ہر فاٹا ٹربیونل تین سال کے مدت کےلیے تشکیل دی جاتی ہے جبکہ یہ مدت پورا ہونےکے بعد دوسرا بینچ تشکیل دیا جاتا ہے۔
قمر ندیم ایڈوکیٹ کے مطابق بظاہر ایسا لگتا ہےکہ حکومت نئے ٹربیونل کی تشکیل میں التواء سے کام لے رہی ہے تاکہ شکیل آفریدی کو زیادہ سے زیادہ وقت کے لیے جیل کی سلاخوں کے پیچھے رکھا جا سکے۔
انھوں نے کہا کہ گذشتہ دو ماہ سے ان کے موکل کے کیس میں کوئی پیش رفت نہیں ہو سکی اور ہر بار سماعت ملتوی کر دی جاتی ہے۔
خیال رہے کہ مئی سنہ 2012 میں خیبر ایجنسی کی پولیٹکل انتظامیہ کی جانب سے ملزم ڈاکٹر شکیل آفریدی کو ایف سی آر کے قانون کے تحت 33 سال قید اور جرمانے کی سزا کا حکم سنایا گیا تھا۔ تاہم بعد میں ملزم کی طرف سے فاٹا ٹربیونل میں اس سزا کے خلاف اپیل دائر کی گئی۔
فاٹا ٹربیونل نے اس ایپل پر دلائل مکمل ہونے پر ایک مختصر فیصلہ سناتے ہوئے ملزم کو دی گئی سزا کو مبہم قرار دیا تھا اور اس کیس کو دوبارہ کمشنر پشاور کی عدالت میں بھیج دیا تھا۔
End of سب سے زیادہ پڑھی جانے والی
یہ بات بھی قابل ذکر ہے کہ ڈاکٹر شکیل آفریدی کے خلاف گذشتہ سال اس مقدمے کے علاوہ قتل کی دفعات کے تحت ایک اور مقدمہ بھی قائم کیا گیا ہے جس کی سماعت جاری ہے۔
شکیل آفریدی کی رہائی کے لیے امریکہ کی جانب سے بھی مطالبات سامنے آتے رہے ہیں۔
گذشتہ ماہ ہی امریکی کانگریس نے ایک بار پھر سے<link type="page"><caption> ڈاکٹر شکیل آفریدی کی رہائی کا مطالبہ</caption><url href="http://www.bbc.co.uk/urdu/world/2015/02/150225_us_congress_pakistan_aid_tim" platform="highweb"/></link> کرتے ہوئے پاکستان کو دی جانے والی پچاس کروڑ ڈالر کی امداد پر پابندی لگانے کے لیے دباؤ ڈالا ہے۔
