بھارتی سیکریٹری خارجہ تین مارچ کو پاکستان آئیں گے
،تصویر کا ذریعہBBC World Service
پاکستان کے دفترِ خارجہ کا کہنا ہے کہ بھارت کے سیکریٹری خارجہ ایس جے شنکر اپنے پاکستانی ہم منصب سے بات چیت کے لیے تین مارچ کو دو روزہ دورے پر پاکستان آئیں گے۔
دفترِ خارجہ کی ترجمان تسنیم اسلم کی جانب سے بدھ کی صبح جاری کیے گئے بیان میں کہا گیا ہے کہ یہ دورہ 13 فروری کو پاکستان اور بھارت کے وزرائے اعظم کی ٹیلیفونک بات چیت میں طے پایا تھا۔
ترجمان کا کہنا ہے کہ ایس جے شنکر پاکستان کے سیکریٹری خارجہ اعزاز احمد چوہدری سے ملاقات کریں گے تاہم بیان میں ملاقات کے ایجنڈے کے بارے میں کچھ نہیں بتایا گیا۔
خیال رہے کہ نریندر مودی سے بات چیت کے بعد پاکستانی وزیرِاعظم کے دفتر سے جاری ہونے والے بیان میں کہا گیا تھا کہ اس میں باہمی دلچسپی کے تمام امور پر گفتگو کی جائے گی۔
بھارت نے گذشتہ برس دہلی میں پاکستانی ہائی کمشنر عبدالباسط کی کشمیری حریت رہنماؤں سے ملاقات کو جواز بنا کر پاکستان سے سیکریٹری سطح کے مذاکرات معطل کرنے کا اعلان کیا تھا۔
،تصویر کا ذریعہ
اس اقدام سے دونوں ممالک کے درمیان اعتماد سازی کو شدید دھچکہ لگا تھا تاہم بات چیت کا یہ عمل اب بحال ہونے والا ہے۔
بھارت میں قوم پرست جماعت بھارتیہ جنتا پارٹی کے اقتدار میں آنے کے بعد سے دونوں ممالک کے تعلقات میں تلخی بڑھی ہے۔
اگرچہ بے جی پی کے رہنما نریندر مودی کے وزارتِ عظمیٰ کا حلف لینے کی تقریب میں وزیراعظم نواز شریف نے خصوصی طور پر شرکت کی تھی لیکن بات آگے نہیں بڑھ سکی۔
End of سب سے زیادہ پڑھی جانے والی
گذشتہ برس دونوں ممالک کے درمیان لائن آف کنٹرول اور ورکنگ باؤنڈری پر جھڑپوں کے متعدد واقعات پیش آئے جس کی وجہ سے کشیدگی میں مزید اضافہ ہوا تھا۔
