پشاور:گرڈ سٹیشن پر حملے میں سات ہلاک
پاکستان کے صوبہ خیبر پختون خواہ کے دارالحکومت پشاور کے مضافاتی علاقے بڈھ بیر میں ایک گرڈ سٹیشن پر شدت پسندوں کے حملے کے نتیجے میں سات افراد ہلاک ہوگئے ہیں جبکہ واپڈا کے چار اہلکار اب بھی لاپتہ ہیں۔
لاپتہ اہلکاروں کی تلاش کے لیے سکیورٹی فورسز کا سرچ آپریشن جاری ہے تاہم ابھی تک کوئی کامیابی حاصل نہیں ہوئی۔
مقامی پولیس کے مطابق پیر اور منگل کی درمیانی شب شدت پسندوں نے شیخ محمدی گاؤں میں واقع واپڈا کےگرڈ سٹیشن پر حملہ کر کے اسے بارود سے اڑا دیا۔
پولیس کے مطابق حملہ آوروں نے حملے کے دوران موقع پر موجود دو افراد کو ہلاک کر دیا جبکہ پولیس اہلکاروں سمیت نو افراد کو ساتھ لے گئے۔
<link type="page"><caption> پشاور کے مضافات میں شدت پسندوں کی کارروائیاں</caption><url href="http://www.bbc.co.uk/urdu/pakistan/2013/04/130402_peshawar_militancy_zis.shtml" platform="highweb"/></link>
اغوا کیے جانے والے نو افراد میں سے پانچ کی لاشیں بعدازاں قریبی علاقے سے مل گئی۔
پشاور میں پیسکو کے ترجمان شوکت افضل نے بی بی سی کو بتایا کہ ہلاک ہونے والوں میں واپڈا کے چار اور پولیس کے تین اہلکار شامل ہیں جبکہ واپڈا کے چار اہلکار اب بھی لاپتہ ہیں۔
انہوں نے کہا کہ شدت پسند راکٹوں سے حملہ کر کے گرڈ سٹیشن کی دیوار توڑ کر اندر داخل ہوئے۔
End of سب سے زیادہ پڑھی جانے والی
ترجمان کے مطابق حملہ آور بھاری اسلحے سے لیس تھے اور انہوں نے بارودی مواد سےگرڈ سٹیشن کے کنٹرول نظام کو تباہ کر دیا جس کی وجہ سے بعض علاقوں کی بجلی منقطع ہو گئی۔
انہوں نے کہا کہ سکیورٹی فورسز نے علاقے کو گھیرے میں لے لیا ہے اور تحقیقات کی جا رہی ہیں۔
بی بی سی سے بات کرتے ہوئے شیخ محمدی گاؤں کے رہائشی مسعود عبدالخیل نے بتایا کہ پیر اور منگل کی درمیانی شب تقریباً ایک بجے بڑی تعداد میں مسلح لوگوں نے گرڈ سٹیشن پر ہلہ بولا اورکنٹرول روم کو بارودی مواد سے تباہ کرنے سے پہلے وہاں موجود دو اہلکاروں کو مار ڈالا۔
انہوں نے کہا کہ ہلاک ہونے والے پانچ افراد کی لاشیں بعد میں گرڈ سٹیشن سے ایک فرلانگ کے فاصلے پر ملیں۔
یاد رہے کہ قبائلی علاقے خیبر ایجنسی کا علاقہ اکاخیل متاثرہ گرڈ سٹیشن سے چند کلومیٹر کے فاصلے پر ہے۔
