فلسطینی صدر محمود عباس کی طرف سے قبل از وقت انتخابات کروانے کے اعلان کے بعد دو راہنماؤں کے مابین شدید کشیدگی پائی جاتی ہے۔

اردن نے فلسطینی وزیر اعظم اور صدر کے درمیان جاری محاذ آرائی کو ختم کرانے میں مدد دینے کی پیشکش تھی۔

حماس کے ایک ترجمان غازی حماد نے مذاکرات کے لیے مسٹر ہانیہ کی رضامندی کی تصدیق کی۔

اردن کی حکومت کا کہنا ہے کہ وہ صدر محمود عباس کی تنظیم فتح اور وزیراعظم اسماعیل ہانیہ کے تنظیم حماس کے درمیان بات چیت کی میزبانی کو تیار ہے۔

اطلاعات کے مطابق صدر عباس پہلے ہی اردن پہنچ چکے ہیں جہاں وہ وزیراعظم معروف البخیت سے مذاکرات کر رہے ہیں۔

حماس اور فتح کی قیادت کے مابین اس وقت تناؤ پیدا ہوگیا تھا جب فتح سے تعلق رکھنے والے فلسطینی انتظامیہ کے صدر محمود عباس نے مخلوط حکومت کے بارے میں مذاکرات کی ناکامی کے بعد قبل از وقت انتخابات کروانے کا اعلان کر دیا تھا۔
اس کے بعد دونوں تنظیموں کے حامیوں کے مابین جھڑپیں شروع ہوگئی تھیں۔