عزیزاللہ خان بی بی سی اردو ڈاٹ کام کوئٹہ

سوکھی ہوئی ہانا لیک جو کوئٹہ کے رہنے والوں کی واحد تفریح گاہ تھی

کوئٹہ میں خشک سالی پر غیر ملکی بین الاقوامی تنظیموں اور صوبائی حکومت کے تعاون سے منعقدہ سیمینار میں ماہرین نے کہا ہے کہ اگر اس مسئلے کی طرف ابھی سے توجہ نہ دی گی تو اس صورتحال پر قابو پانا مشکل ہو جائے گا۔

سیمینار کے ایک منتظم بین الاقوامی امدادی ادارے اوکسفام کے عہدیدار ادریس خان نے بتایا ہے کہ گزشتہ سات سالہ خشک سالی سے صوبے کے بعض علاقے سخت متاثر ہوئے ہیں جن میں نوشکی نمایاں ہے جہاں سے بڑی تعداد میں لوگوں نے نقل مکانی شروع کر دی ہے بلکہ وہاں لوگ امدادی اداروں سے مدد کی اپیل کرتے ہیں۔

پشتون قوم پرست جماعت پشتونخواہ ملی عوامی پارٹی نے اپنے تئیں ایک تحقیق کی ہے جس میں انھوں نے کہا ہے کہ پشتون علاقوں میں کل ساڑھے سترہ سو کاریزوں میں سے تقریبا ساڑھے تیرہ سو خشک ہو چکی ہیں اسی طرح تین ہزار سے زائد چشموں میں سے چھبیس سو سے زیادہ چشمے خشک ہوگئے ہیں گیارہ ہزار میں سے ساڑھے پانچ ہزار ٹیوب ویل خشک ہیں۔

جماعت کے صوبائی سیکرٹری عثمان کاکڑ نے سیمینار میں بتایا ہے کہ پینتالیس لاکھ سے زائد درخت خشک اور تقریبا اڑتیس لاکھ مویشی ہلاک ہو چکے ہیں۔ اگر ان کا تخمینہ لگایا جائے تو اربوں کا نقصان ہوا ہے اور اس کی ذمہ داری حکومت پر عائد ہوتی ہے ۔

سوکھی ہوئی ہانا لیک کا ایک منظر

کوئٹہ شہر میں زیر زمین پانی کی سطح کافی نیچے گر گئی ہے۔ اکثر علاقوں میں لوگ تین سو روپے کا ٹینکر خریدتے ہیں اور ایک مہینے میں ڈیڑھ ہزار سے دو ہزار روپے کا پانی خریدتے ہیں۔

کوئٹہ میں بارش کے لیے عید سے پہلے اور بعد میں بھی نماز استسقاء ادا کی گئی لیکن بارشیں نہیں ہوئیں۔ اب ماہرین موسمیات نے کہا ہے کہ اگلے سال جنوری فروری میں بارشیں ہونے کی توقع ہے۔

بلوچستان حکومت کے سیکرٹری آبپاشی عبدالسلام نے کہا ہے کہ آبپاشی کے منصوبوں کے لیے فراہم کردہ رقم صوبے کے قبائل اور معاشرتی حالات کی وجہ سے استعمال نہیں ہو پائی۔ اگلے سال سے ایک اور منصوبے کے تحت جو رقم فراہم کی جائے گی اسے بہتر طریقے سے استعمال کیا جائے گا۔

ماہرین کا کہنا ہے کہ بلوچستان میں کسان اور زمینداروں نے پانی کو کفایت سے استعمال نہیں کیا اور اب بھی آبپاشی کے جدید طریقے استعمال نہیں کرتے جس وجہ سے پانی کا زیاں ہوتا ہے۔