اعجاز مہر بی بی سی اردو ڈاٹ کام، اسلام آباد

اگر بارشیں نہ ہوئیں تو گندم کی آئندہ فصل متاثر ہونے کا خدشہ ہے

پاکستان میں نماز استسقاء عین وقت پر مؤخر کرنے کی وجہ بتاتے ہوئے وزیراعظم کے ترجمان نے کہا ہے کہ جمعہ مقدس دن ہے اس لیے خصوصی نماز جمعہ تک ملتوی کی گئی ہے۔

وزیراعظم شوکت عزیز نے قوم سے اپیل کی تھی کہ ملک بھر میں بدھ آٹھ ستمبر کو نماز استسقاء ادا کی جائے تاکہ ملک میں بارشیں ہوں اور خُشک سالی دور ہو جائے۔

وزیراعظم جو کہ انیس رکنی وفد کے ہمراہ سعودی عرب کے تین روزہ دورے پر ہیں انہوں نے مسجد نبوی میں نماز استسقاء ادا کی اور اللہ تعالیٰ سے بارش کی خصوصی دعا مانگی۔

وزیراعظم کے وفد میں شامل وزیراطلاعات شیخ رشید احمد نے سعودی عرب سے فون پر پاکستان کے ایک نجی ٹی وی چینل سے بات کرتے ہوئے دعویٰ کیاہے کہ مسجد نبوی کی تاریخ میں پہلی بار نماز استسقاء ادا کی گئی ہے۔

رواں سال میں پاکستان میں بارشیں کم ہوئی ہیں اور گلیشیئر بھی قدر کم پگھلے جس کی وجہ سے ڈیموں میں پانی کا ذخیرہ بھی کم ہو گیا ہے۔

پاکستان میں پانی کی تقسیم کے مجاز ادارے ’ارسا، کے مطابق اس سال تربیلا ڈیم میں گنجائش سے پینتالیس فیصد جبکہ منگلا ڈیم میں چھتیس فیصد کم پانی ذخیرہ ہوا ہے۔

ماہرین کا کہنا ہے کہ اگر بارشیں نہ ہوئیں تو پانی کی کمی پچاس فیصد سے بھی بڑھ سکتی ہے جس سے یکم اکتوبر سے شروع ہونے والی ربیع کے موسم میں گندم سمیت دیگر فصلوں کی کاشت بھی شدید طور پر متاثر ہوسکتی ہے۔