وسعت اللہ خان بی بی سی اردو ڈاٹ کام، اسلام آباد

	’ کچھ نہ کچھ کہیں نہ کہیں تو ضرور ہوگا۔حالانکہ آج سولہ نومبر ہے‘

بلوچستان کے علاقے زیارت میں گذری رات درجہ حرارت منفی اعشاریہ آٹھ رہا۔تیس ہزار سے زائد بے گھر افراد پتلے امدادی خیموں میں یہ سردی برداشت کررہے ہیں۔کسی عورت نے اپنی آدھی چادر ٹھٹھرتے بچے کو اوڑھا رکھی ہے اور وہ مسلسل اپنے کھانستے ہوئے لختِ جگر کا رونا برداشت کررہی ہے۔اسکا آدمی لائن میں کھڑا دعا مانگ رہا ہے کہ باری آنے سے پہلے راشن نہ ختم ہوجائے۔زلزلہ زدگان کو یہ بھی معلوم ہوگیا ہے کہ اپنی جیب سے ایک کروڑ روپے سے زائد خرچ کرکے دو سو آدمیوں کو عمرے پر لے جانے والا اور پھر نیویارک روانہ ہونے والا صدرِ مملکت ان کا حال پوچھنے نہیں آیا۔یہ سب کچھ یہ بے خانماں تین ہفتے سے برداشت کررہے ہیں۔اور آج تو ویسے بھی سولہ نومبر ہے۔

ہم کالے، گورے، بھورے، پیلے سب دعوی کرتے ہیں کہ ہمارا عقیدہ برداشت و رواداری و درگذر ہے۔لیکن جب کوئی ضرورت مند قریب آئے تو دس بار سوچتے ہیں کہ کہیں یہ فراڈ تو نہیں، پیشہ ور بھکاری تو نہیں، جھوٹا تو نہیں

ہم کالے، گورے، بھورے، پیلے سب دعوی کرتے ہیں کہ ہمارا عقیدہ برداشت و رواداری و درگذر ہے۔لیکن جب کوئی ضرورت مند قریب آئے تو دس بار سوچتے ہیں کہ کہیں یہ فراڈ تو نہیں، پیشہ ور بھکاری تو نہیں، جھوٹا تو نہیں۔اور پھر ہم اپنا منہ پھیر لیتے ہیں۔لیکن جب ہمارے ہی لاکھوں روپے کسی کاروبار میں ڈوب جائیں یا کوئی لے اڑے تو ہم چپ چاپ صبر کرلیتے ہیں اور زیادہ نہیں سوچتے۔

ہم کسی کو ٹکر ماردیں تو توقع رکھتے ہیں کہ سامنے والا فوراً معاف کردے۔ اگر کوئی ہمیں ٹکر ماردے تو منہ سے جھاگ نکلنے شروع ہوجاتے ہیں۔ہم چاہتے ہیں کہ ہماری بے اعتدالیوں کو انسانی کمزوری سمجھ کر درگذر کردیا جائے۔لیکن یہ بھی چاہتے ہیں کہ ہمارے دوست ، ساتھی، ہمارے بچے اور عورتیں انسانی کمزوریوں سے ماورا ہوں۔وہ نہ تو ہمیں چیلنج کریں اور نہ ہی ہماری قوتِ برداشت کو آزمائیں۔

ہم بڑے بڑے خونی آمروں کو کتنی آسانی سے معاف کرکے بھول جاتےہیں لیکن اپنے بھائی اور ہمسائے کی خطا معاف کرکے بھی یاد رکھتے ہیں۔

تین سو چونسٹھ دن نہ سہی لیکن کم ازکم آج کے دن ہمیں اپنےگریبانوں میں جھانک لینا چاہئیے۔کیونکہ آج سولہ نومبر کا دن عالمی یومِ برداشت کے طور پر منایا جارہا ہے۔عدم برداشت صرف چند گھنٹے کے ہی تو فاصلے پر ہے۔سترہ نومبر دور ہی کتنا ہے۔