وسعت اللہ خان بی بی سی اردو ڈاٹ کام

	مغلوں تک میں باقاعدہ تنخواہ دار لاکھوں کی فوج رکھنے کا کوئی تصور نہیں تھا

جب جدید قومی ریاستوں کی تشکیل شروع ہوئی تو باقاعدہ تنخواہ دار فوج رکھنے کی ضرورت بھی محسوس ہوئی۔ لیکن یہ اصول اپنی جگہ برقرار رہا کہ انہیں شہروں سے دور چھاؤنیوں میں بسایا جائے تاکہ شہریوں سے گھلنے ملنے کے سبب ان کا ڈسپلن اور پیشہ ورانہ صلاحیت متاثر نہ ہو اور وہ شہری آسائشوں کی طلب میں پڑ کر حکم بجا لانے اور دشمن سے بے جگری سے لڑنے کی صلاحیت نہ کھو بیٹھیں۔

لیکن جن جن ریاستوں میں یہ اصول توڑا گیا وہ پھر کہیں کی نہ رہیں۔

کسی بھی ادارے کو ایسے معاملات میں الجھا دینا یا الجھنے کی اجازت دینا جن کا اسے پوری طرح ادراک نہ ہو دراصل بیل کو شیش محل میں مدعو کرنے کے برابر ہے۔

ایک فوجی کو یہ بات سکھائی جاتی ہے کہ اسے اپنے افسر کے احکامات پر بغیر سوال کیئے مرتے دم تک عمل کرنا ہے۔ جبکہ ایک جرنیل اپنی پینتیس، چالیس برس کی پیشہ ورانہ زندگی صرف اس تکون میں گزارتا ہے کہ پہلے دشمن کی شناخت کرو، پھر اسے تباہ کرنے کی سٹریٹجی تشکیل دو اور پھر اس پر پوری طاقت سے عمل کرکے مطلوبہ ہدف حاصل کرو۔

اس ذہنی تشکیل کے ساتھ جب ایک جرنیل ایک اجنبی شعبے میں داخل ہوتا ہے تو کیا ہوتا ہے۔

ایوب خان نے سیاستدانوں کو بطور دشمن شناخت کیا۔ سن باسٹھ کے آئین اور بنیادی جمہوریتوں کے نظام کے تحت ان سے نمٹنے کی سٹریٹجی اپنائی اور جو ایکشن لیا اس کے نتیجے میں متحدہ ہندوستان سے ورثے میں ملی ہوئی سو سالہ سیاسی رواداری اور معاملہ فہمی کی روایت تباہ ہوگئی۔

	مشرف نے دو ملک گیر جماعتوں کو دشمن تصور کیا

ضیا الحق نے ذوالفقار علی بھٹو کو ٹارگٹ جانا۔ انہیں پھانسی دے کر معاملات حل کرنے کی حکمتِ عملی بنائی اور اس ایکشن کے نتیجے میں ملک گیر سیاست کے رجحان کو ٹکڑے ٹکڑے کردیا۔

صدر پرویز مشرف نے دو ملک گیر جماعتوں کو دشمن تصور کیا۔ انہیں جسدِ سیاست سے نکالنے کے لیئے بے روح انتخابات کے ذریعے کارڈ بورڈ پارلیمنٹ تشکیل دینے کی حکمتِ عملی اپنائی اور اس ایکشن کے نتیجے میں نہ صرف قوم پرستی کے تنِ مردہ میں جان پڑ گئی بلکہ فوج اور عوام کے درمیان بچی کھچی خیر سگالی کی روح بھی شدید زخمی ہو گئی۔

ایک ماہر ڈرائیور سے یہ توقع رکھنا کہ وہ طیارہ بھی اتنی مہارت سے اڑا سکتا ہے۔

یہ ڈرائیور کی بھی بدقسمتی ہے اور طیارے میں سوار مسافروں کی بھی۔