عارف شمیم بی بی سی اردو ڈاٹ کام، لندن

آزاد معاشرے میں یہ بتایا نہیں جاتا کہ آپ کو کیا پہننا چاہیئے

ہوا یوں کہ افغانوں کے دیس میں وہ اپنے پہلے ہی دن یہ دیکھ کر حیران رہ گیا کہ جو خواتین جنگ کے دوران اور اس سے قبل اپنے مردوں سے دس قدم پیچھے چلتی تھیں اب دس قدم آگے چل رہی تھیں۔ ’کیا یہ عورت کو برابر حقوق دیے جانے اور اس کی عزت بڑھانے کی وجہ سے ہے‘، صحافی نے اپنے مترجم سے پوچھا۔ ’نہیں بارودی سرنگوں کی وجہ سے‘، مترجم نے نہایت اطمینان سے جواب دیا۔

گزشتہ ماہ عورتوں کےعالمی اعلامیے کے ساتھ بھارتی خواتین کا وفد پاکستان آیا۔ پاکستان کی خواتین اس اعلامیہ کو لے کر اب آذر بائیجان جائینگی۔ جہاں سے یہ مختلف ممالک سے ہوتا ہوا سترہ اکتوبر کو افریقہ کے چھوٹے سے ملک
برکیانو فاسو میں اختمام پذیر ہوگا۔

بھارت سے اس اعلامیے کو پاکستان لانے والی خواتین کا کہنا تھا کہ عورتوں کا عالمی اعلامیہ تمام مرد و عورت، سماجی تحریکوں اور سول سوسائیٹیوں اور ان تمام لوگوں کے درمیان اتحاد کا مظہر ہے جو اس دنیا میں تبدیلی لانے کے خواہشمند ہیں۔

ویسے بھی دنیا میں کافی تبدیلی آ رہی ہے۔ افغان عورت جو اب پیچھے کی بجائے آگے چل رہی ہے۔ پاکستان میں بھی عورتیں اپنی عزت بچانے کے لیے گاؤں کی پنچایت کی اور شہر میں دوڑنے کے لیے شہر کے ناظمِ اعلیٰ تک کی اجازت کی منتظر ہیں۔ پہلے عورت کے ساتھ جنسی زیادتی ہوتی ہے اور پھر اسے اپنا منہ بند رکھنے کو کہا جاتا ہے کیونکہ اس سے ’ملک بدنام ہوتا ہے‘۔ اگر اس کے ساتھ زیادتی ہو تو کہا جاتا ہے کہ اس کی ’عزت لٹ‘ گئی اور اگر وہ اس کے متعلق بات کرے تو وہ پورے ملک کی بدنامی کا باعث بنتی ہے۔

یہ تو کم پڑھے لکھے تیسری دنیا کے ممالک کا حال ہے لیکن پہلی دنیا میں کیا ہو رہا ہے۔ عورت کو کتنی آزادی ہے اور کیا کوئی اس کی آزادی یا اس کے حقوق کے بارے میں اس سے پوچھتا بھی ہے یا نہیں۔

خواتین کے حجاب سے متعلق نت نئے سوالات اٹھتے رہتے ہیں

یہاں تک تو ٹھیک تھا۔ مسلم رہنما نے بیان دے دیا اور میڈیا نے اسے اٹھا لیا۔ لیکن کیا مسلم رہنما نے یہ بیان دینے سے پہلے مسلم خواتین سے پوچھا کہ وہ کیا چاہتی ہیں۔ انہوں نے شاید اس کی ضرورت محسوس نہیں کی کیونکہ اس کے لیے انہوں نے آیات کا حوالہ دینا کافی سمجھا۔ ٹی وی، ریڈیو اور اخبارات میں ہم جیسے کئی صحافی نوجوان مسلمانوں کو بلا کر ان سے اس کے متعلق سوالات کرتے ہیں اور جب وہ آگے سے کہتے ہیں کہ عورت کو حق ہے کہ وہ حجاب پہنے یا نہ پہنے تو جواب ملتا ہے کہ ’یہ تو آپ کے مزہبی رہنما کہہ رہے ہیں‘۔

سوال یہ ہے کہ اس وقت حقوقِ انسانی یا حقوقِ نسواں کے نمائندوں کی آواز کیوں نہیں آ رہی کہ یہ کیا ہے۔ اس وقت مسئلہ حجاب کا نہیں ہے۔ مسئلہ عورت کے ڈر اور اسے ہراساں کرنے کا ہے۔ کیوں اٹھ کر کوئی یہ نہیں کہتا کہ عورت کو کوئی ہراساں ہی کیوں کرے۔ اس کا اس سارے مسئلے سے کیا تعلق ہے۔ ایسی آوازیں کہاں چلے گئی ہیں۔ کیا لندن کے بموں کی آوازوں نے انہیں بالکل ہی دبا دیا ہے۔

مجھے یاد ہے کہ پنجاب میں جب فرقہ وارانہ قتل و غارت بڑھ گئی تھی تو ضلعی انتظامیہ نے یہ حکم جاری کیا تھا کہ اب موٹر سائکلوں پر مرد حضرات بھی عورتوں کی طرح دونوں ٹانگیں ایک طرف کر کے بیٹھا کریں۔ شاید فسادات ختم ہو گئے تھے اور اس کے بعد سب ہی ہنسی خوشی رہنے لگے۔

عورت کو دس قدم آگے چلنے کو کہیں یا دس قدم پیچھے چلنے کو بس کہیں آپ ہی۔ کیونکہ مرضی بس آپ ہی کی ہے۔