آشوٹز میں بہت سے بچوں کو یتیم کر دیا گیا۔

ان کے دو بڑے بھائی اور ایک بہن روس بھاگ گئے۔ ان کی ایک دوسری بہن کو اس وقت قتل کر دیا گیا جب وہ اس کیمپ سے بھاگنے کی کوشش کر رہی تھی۔

جب ان کیمپوں کا خاتمہ ہوا تو ان کے والدین کو ’ٹریبلنکا ڈیتھ کیمپ‘ بھیج دیا گیا اور وہاں انہیں قتل کر دیا گیا۔ خود بیٹشیوا دیگان کو آشوٹز بھیج دیا گیا۔ یہ ان کی کہانی ہے۔

’ آشوٹز بھیجے جانے سے پہلے میں اس جگہ کے متعلق کچھ نہیں جانتی تھی۔

وہاں مجھے ایک خوش وخرم لڑکی سے ایک قیدی میں بدل دیا گیا۔ انہوں نے میرے بازو پر ٹیٹو بنائے، مجھے گنجا کیا، میرے کپڑے لے لیے اور مجھے قیدیوں کے لیے مخصوص چیتھڑے دے کر کام پر بھیج دیا۔

بیٹشیوا دگان نے آشوٹز میں بیس ماہ گزارے

مجھے ٹائفس ہو گیا۔ میں خوش قسمت تھی کہ ایک دن مجھے میری ایک کزن مل گئی جس کا شوہر ڈاکٹر تھا۔ وہ مجھے ملیریا کے ہسپتال لے گئی۔

وہاں مجھے ’سلیکشن‘ کے تجربے سے گزرنا پڑا جس میں افسر لڑکیوں کو برہنہ کر کے دیوار کے ساتھ ایک قطار میں کھڑا کر دیتے تھے۔

مجھے بری قسم کی خارش تھی اور میرے پورے جسم سے خون رستا تھا مگر افسروں نے مجھے بخش دیا۔ باقی لڑکیوں کو چُن چُن کر گیس کے چیمبر میں بھیج دیا گیا۔

سلیکشن  وہاں مجھے ’سلیکشن‘ کے تجربے سے گزرنا پڑا جس میں افسر لڑکیوں کو برہنہ کر کے دیوار کے ساتھ ایک قطار میں کھڑا کر دیتے تھے۔

وہاں ہمیں ان لوگوں کے سامان کی تلاشی لینی ہوتی تھی جو مر چکے تھے۔ ہمیں ایسے سوٹ کیسوں کو جلا دینے کا حکم تھا جن پر کیمپوں میں موجود لوگوں کے گھروں کا پتہ ہوتا تھا۔

میں نے وہاں بہت سے لوگوں کو موت کے گھاٹ اُترتے دیکھا۔ نازی آفسر ان کو برہنہ کر کے ان کا پیچھا کرتے اور ان پر زائکلون بی گیس چھوڑ دیتے۔

گیس کے پھیلاؤ کے دوران میں نے بیس منٹ تک چیخ و پکار سنی اور اس کے بعد خاموشی چھا گئی۔ پھر لاشوں کو باہر پھینک دیا جاتا۔

یہ ہر وقت کا معمول تھا۔ 1943 اور 1944 کےان دو سالوں میں میں نے وہاں بہت قتلِ عام ہوتے دیکھا۔

صرف یہودی ہی نہیں بلکہ انہوں نے جپسی، پولز، سوویت، ہم جنس پرستوں اور بیماروں کا بھی قتل کیا۔ اپاہج لوگ مرنے والوں میں سب سے پہلے تھے۔

میں نے آشوٹز میں بیس ماہ یا چھ سو دن گزارے۔ ذرا تصور کیجیے کہ اتنے دن، ہر دن میں چوبیس گھنٹے بے چین رہتی تھی اور ہر لمحہ یہ خیال آتا تھا کہ میری باری کب آئے گی؟

تاہم میں نے اس بات کا یقین رکھا کہ میں زندہ رہوں گی اور اسی یقین نے میری بہت مدد کی۔

کیمپ میں آٹھ اور لڑکیاں بھی تھیں جن سے ہمارا لگاؤ ایک عارضی کنبے کی حیثیت اختیار کرگیا۔ میں بہت حد تک ان کے سہارے کی وجہ سے بھی زندہ رہی۔ یہ لڑکیاں بھی اپنے خاندان والوں کو کھو چکی تھیں اور ایک گروہ کی صورت میں ہم ایک دوسرے کی مدد کرتی رہیں۔

جب جنوری 1945 میں سوویت فوج نے آشوٹز کی جانب پیش رفت شروع کی تو ہم میں سے ہزاروں کو کیمپ میں سے موت کی مارچ پر لے جایا گیا۔

یہ ایک مشکل مرحلہ تھا۔ سردی بہت تھی اور جو مارچ نہیں کر سکتا تھا اسے سر میں گولی مار دی جاتی تھی۔ ان میں سے جو بچ گئے انہیں ٹرین پر پہلے ریونسبروخ اور پھر مالخاؤ لے جایا گیا۔ مجھے پھر لبز کی جانب مارچ کرنے کو کہا گیا جہاں خوش قسمتی سے امریکیوں نے ہمیں آزاد کروالیا۔

آج ساٹھ سال بعد جو کچھ ہوا اس پر یقین کرنا مشکل ہے۔ یہ بات ناقابل یقین ہے کہ ایک انسان دوسرے انسان کے ساتھ یہ سب کچھ کر سکتا ہے۔

پیچھے مڑ کر دیکھتی ہوں تو ایک جیت کا احساس ہوتا ہے۔ ایک ذاتی جیت اور ایک عام سی جیت کا احساس۔ ہم سب کو موت کے منہ میں ڈال دیا گیا تھا لیکن اتنا سب ہونے کے باوجود ہم سب آج زندہ ہیں۔

باقی کی لڑکیاں مختلف ممالک کی طرف چلی گئیں، جبکہ ہم میں سے کچھ اسرائیل آگئیں۔

موت اور زندگی کا مرحلہ  یہ ایک مشکل مرحلہ تھا۔ سردی بہت تھی اور جو مارچ نہیں کر سکتا تھا اسے سر میں گولی مار دی جاتی تھی۔

اس وقت سے لے کر اب تک میں چار مرتبہ آشوٹز جا چکی ہوں۔

میں آج ساٹھ برس مکمل ہونے پر اس وقت کو اپنے ان ساتھیوں سےجو میرے ساتھ تھے، بات چیت کر کے اور بہت خوشی اور گہرے غم کے ساتھ یاد کروں گی۔

خوشی اس بات کی کہ میں بچ نکلنے میں کامیاب رہی اور دکھ اس بات کا کہ میں نے اپنے خاندان کو کھو دیا اور بہت سے لوگوں نے بھی نقصان اُٹھایا۔‘