شکیل اختر بی بی سی اردو ڈاٹ کام، دلی

	ہندوستانی جنگی جہاز خلیج عدن میں گشت کر رہا ہے

بحریہ کے ایک افسر کے مطابق صومالیائی قزاقوں نے پیر کی رات تفریبا دس بجے خلیج عدن میں گشت پر مامور بحریہ کے جنگی جہاز آئی این ایس تبار پر گولی باری کی۔ قزاقوں کے جہاز کے ساتھ متعد تیز رفتار موٹر بوٹس بھی تھیں۔

جوابی کارروائی میں بحریہ کے کمانڈوز نے ‍قزاقوں کے جہاز پر حملہ کیا اور اسے غرقاب کر دیا۔

اطلاع کے مطابق بعض صومالیائی لٹیرے موٹر بوٹ کے ذریعے فرار ہونے میں کامیاب ہوگئے۔ بحریہ کے افسر نے بتایا ہے کہ اس واقعہ میں بحریہ کے اہلکاروں کو کوئی نقصان نہیں پہنچا ہے۔

خلیج عدن میں صومالیائی قزاق ایک عرصے سے سرگرم ہیں۔ یہ انتہائی اہم بحری راستہ ہے اور ہندوستان کے تقریباً بیس فی صد تجارتی جہاز اسی راستے سے گزرتے ہیں اور سویز نہر سےگزرنے والے سبھی ہندوستانی جہازوں کوصومالیہ کے ساحل کے نزدیک واقع اسی راستے سے گزر کر جانا ہوتا ہے۔

متعدد جہازوں کے اغوا کے بعد ہندوستان نے خلیج عدن میں اپنے جہازوں کے تحفظ کے لیے اپنا ایک جنگی جہازگشت پر بھیجا۔ آئی این ایس تبار نےگزشتہ ہفتے ایک ہندوستانی تجارتی جہاز پر قزاقوں کے قبضے کی ایک کوشش کو ناکام بنا دیا تھا۔

خطے میں جنگی جہاز بھیجتے وقت ہندوستانی بحریہ کے سربراہ نے کہا تھا کہ قزاقی کا مقابلہ سبھی ملکوں کو بالکل جنگ کی طرح کرنا ہوگا۔

یہ واقعہ ایک ایسے وقت میں پیش آیا ہے جب صومالیائی قزاقوں نے سعودی عرب کے ایک بہت بڑے تیل ٹینکر پر قبضہ کر لیا ہے۔