وزیراعظم منموہن سنگھ لال قعلہ سے پانچویں بار خطاب کریں گے

حالیہ مہینوں کے دوران ہونے والے بم دھماکوں اور جموں اور کشمیر میں گزشتہ چند روز سے جاری مظاہروں میں بیس سے زائد افراد کی ہلاکت کے مدنظر پورے ملک میں سکیورٹی الرٹ ہے۔

ہندوستان کے زیرانتظام کشمیر میں علیحدگی پسند جماعتوں نے یومِ آزادی کی تقریبات کے بائیکاٹ کا اعلان کیا ہے۔ جمعہ کو کشمیری علیحدگی پسند ایک عام ہڑتال کریں گے اور یومِ سیاہ منائیں گے۔

دہلی کے تمام علاقوں میں دسیوں ہزار سکیورٹی اہلکار تعینات ہیں۔ خصوصی طور پر دہلی کے تاریخی لال قلعہ کے اطراف میں سکیورٹی انتہائی سخت ہے۔

اس موقع پر وزیراعظم منموہن سنگھ لال قلعہ سے پانچویں بار قوم سے خطاب کریں گے۔ لال قلعہ کے قریب واقع تمام اونچی عمارتوں پر سکیورٹی کے اہلکار تعینات ہیں۔

گزشتہ ماہ بنگلور اور احمدآباد میں بم دھماکوں میں پچاس سے زائد افراد ہلاک ہوگئے تھے اور حال ہی قومی سلامتی کے مشیر ایم کے نارائنن نے کہا ہے کہ انٹیلیجنس ایجنسیوں نے ملک میں آٹھ سو شدت پسند یونِٹوں کا پتہ لگایا ہے۔