تیل کی قمیتوں کے اضافے کا اثر ضرورت کی ہر اشیاء کی قمیتوں پر پڑے گا

معاشی صورتِ حال پر نظر رکھنے والے مبصرین کا کہنا ہے کہ تمام کوششوں کے باوجود ہندوستان میں حکومت مہنگائی پر قابو پانے میں ناکام رہی ہے اور اشیائے صرف کی قیمتیں روز بروز بڑھ رہی ہیں۔

ہندوستان میں حکومت کے تازہ جائزوں کے مطابق اس ہفتے ضروری اشیاء کی قیمتوں میں مزید اضافہ ریکاڈ کیا گیا ہے اور اور اضافے کی شرح آٹھ اعشاریہ سات پانچ فیصد تک پہنچ گئی ہے۔

اس سے قبل سنہ دو ہزار ایک میں قیمتوں میں اضافے کی شرح آٹھ اعشاریہ سات سات ریکارڈ کی گئی تھی۔

قیمتوں میں افراط کی شرح میں اضافہ بنیادی طور پر کھانے کی اشیاء کی قیمتوں میں اضافے کے سبب ہو رہا ہے۔

ہندوستان ان چند ممالک میں سے ایک ہے جہاں قیمتوں میں اضافے کی شرح کا جائزہ ہفتہ وار بنیاد پر لیا جاتا ہے۔

قیمتوں میں اضافے کی شرح کا تعین اناج، پھل ، سبزی اور پٹرولیم کی قیمتوں اور سروس کی ہول سیل قیمتوں میں اتار چڑھاؤ کی بنیاد پر کیا جاتا ہے۔

حکومت نے ضروری اشیاء کی قیمتیں کم کرنے کے لیے کئی اقدمات کا اعلان کیا ہے لیکن تیل کی عالمی قیمتوں میں اضافے کے اثرات کی وجہ سے مہنگائي کم ہونے بجائے بڑھتی جا رہی ہے۔

ماہرین کا کہنا ہے کہ حکومت نے قیمتوں میں اضافے کی جو شرح بتائی ہے وہ حقیقت میں کہیں زیادہ ہے اور مستقبل قریب میں مہنگائی میں کمی کے کوئی آثار نہیں ہیں۔

مہنگائی حکومت کے لیے تشویشناک معاملہ تو ہے ہی لیکن یہ معاملہ مزید پریشانی کا سبب اس لیے بھی بن گیا ہے کیونکہ آئندہ مہینوں میں کئی ریاستوں میں انتخابات ہونے والے ہیں۔