اشیاء خورد نوش کی قیمتوں میں زبردست اضافہ ہوا ہے جس سے حکومت بھی پریشان ہے

اتورا کی شام نئے وزراء کی حلف برداری کے بعد نامہ نگاروں سے بات کرتے ہوئے وزیر اعظم کا کہنا تھا کہ’حکومت افراط زر میں اضافے سے متعلق فکر مند رہی ہے، اس پر قابو پانے کے لیے مزید اقدامات کیے جائیں گیے اور اس کا اثر اگلے چند ہفتوں میں دکھنا چاہیے۔‘

منموہن سنگھ نے بڑھتی مہنگائی کے لیے دنیا بھر کے اقتصادی حالات کو ذمہ دار ٹھہرایا۔ان کا کہنا تھا کہ ’دنیا بھر میں اشیاء خورد و نوش اور خام تیل کی قمیت بڑھ رہی ہے۔ خام تیل کی قیمت اس وقت سب سے زیادہ ہے اس کے باوجود ہم نے پبلک ڈسٹریبیوشن کے نظام میں اشیاء خورد و نوش اور مٹی کے تیل کی قیمت نہیں بڑھائی اور خوردنی تیل امپورٹ کر کے قیمت پر قابو پانے کی کوشش کر رہے ہيں۔‘

دوسری جانب کانگریس پارٹی کی صدر سونیا گاندھی کا کہنا تھا کہ مہنگائی پر قابو پانے کے لیے حکومت کوئي بھی قدم اٹھانے سے گریز نہيں کرے گی۔

کامرس و تجارت کے ادارے کے صدر وی این دھوت نے متنبہ کیا ہے کہ مہنگائی کی شرح آئندہ مہینے بڑھ کر ساڑھے سات فیصد پہنچ سکتی ہے۔

غور طلب بات یہ ہے کہ بائیس مارچ کو مہنگائی کی شرح سات فیصد پر پہنچ گئی تھی جو گزشتہ تین برسوں میں سب سے زيادہ ہے۔