نکولس برنز اور بھارتی وزیر خارجہ (فائل فوٹو)

امریکہ کے نائب وزیر خارجہ نکولس برنز نے کہا ہے کہ امریکہ میں صدارتی انتخابات کی وجہ سے وقت ضائع ہو رہا ہے جبکہ بھارت میں امریکی سفیر ڈیوڈ ملفورڈ کا کہنا تھا کہ اگر موجودہ کانگریس کی معیاد کے دوران جوہری معاہدہ منظور نہیں کرایا جاتا تو پھر امکان نہیں کہ انڈیا کو ایسی پیشکش دوبارہ کی جائے گی۔

واضح رہے کہ اس متنازعہ جوہری تعاون کے معاہدے کے تحت انڈیا کو، جوہری عدم پھیلاؤ کے عالمی معاہدے پر دستخط کیے بغیر، امریکہ کے جوہری توانائی کے وسائل اور ٹیکنالوجی تک رسائی حاصل ہو سکتی ہے۔

انڈیا میں بائیں بازو کی جماعتیں امریکہ کے ساتھ اس معاہدے کے خلاف ہیں اور ان کا کہنا ہے کہ اس سے امریکہ کو بہت زیادہ اثر و رسوخ حاصل ہو جائے گا۔ موجودہ حکمران اتحاد میں شامل ان جماعتوں نے دھمکی دے رکھی ہے کہ اگر کانگریس کی سربراہی میں قائم حکومت اس معاہدے کو حتمی شکل دیتی ہے تو وہ حکومت سے نکل جائیں گی۔