بنارس میں کچہری میں دو بم دھماکے ہوئے ہیں

ان سلسلہ وار دھماکوں میں درجنوں افراد زخمی ہوئے ہیں اور خبروں کے مطابق ہلاک ہونے والوں کی تعداد میں مزید اضافہ ہو سکتا ہے۔

ہر طرف دھواں ہی دھواں تھا: عینی شاہد

لکھنؤ پولیس کے آئی جی اے کے جین نے بی بی سی کو بتایا ہے کہ فیض آباد دھماکوں میں ملوث شدت پسند کا خاکہ تیار کر لیا گیا ہے۔ اس کے علاوہ ریاستی حکومت نے ریاست کے تمام بڑے شہروں میں ریڈ الرٹ کا اعلان کیا ہے اور متاثرہ شہروں میں سپیشل ٹاسک فورس بھیجنے کا فیصلہ کیا گيا ہے جو ان دھماکوں کی تفتیش کرے گی۔

	دھماکوں میں تیرہ افراد کے ہلاک ہونے کی تصدیق ہو چکی ہے

تفصیلات کے مطابق بنارس میں کچہری میں دو بم دھماکے ہوئے ہیں جس میں نو افراد ہلاک اور بائيس سے زائد زخمی ہوئے۔ اطلاعات کے مطابق بیشتر زخمی وکیل ہیں اور بعض زخمیوں کی حالات نازک ہے۔

فیض آباد کی بھی کچہری میں بم دھماکے ہوئے جس میں اب تک چار افراد کے ہلاک اور ایک درجن کے زخمی ہونے کی خبر ہے۔ ایک مقامی صحافی نے بی بی سی کوبتا یا ہے کہ فیض آباد کی ضلعی عدالت کے احاطے میں کم سے کم دو دھماکے ہوئے ہیں۔

	تینوں دھماکوں میں سائیکلوں کا استعمال کیا گیا ہے

لکھنؤ میں سول عدالت کے احاطے میں دھماکہ ہوا ہے جس میں کسی کے ہلاک یا زخمی ہونے کی اطلاع نہیں ہے۔ لکھنؤ میں دھماکوں کے بعد وکلاء نے حفاظتی بندوبست کی ناکامی پر حکومت کے خلاف نعرے بازی کی ہے۔

مملکتی وزیر داخلہ پرکاش جیسوال کا ان دھماکوں کے متعلق کہنا تھا کہ ’ابتدائی طور پر اس کے متعلق کچھ بھی کہنا مشکل ہے لیکن لگتا ہے کہ شدت پسندوں کی طرف سے یہ دہشت پھیلانے کی کوشش ہے۔ ایک ہی وقت میں تین شہروں میں دھماکوں سے صاف ہے کہ یہ سوچی سمجھی سازش کا نتیجہ ہے۔‘

وزیراعظم منموہن سنگھ اور کانگریس کی صدر سونیا گاندھی سمیت مختلف سیاسی جماعتوں نے ان دھماکوں کی سخت الفاظ میں مذمت کی ہے۔

	اترپردیش کی وزیرِ اعلیٰ مایاوتی فیض آباد میں جائے وقوعہ کا معائنہ کر رہی ہیں

ریاست کی وزیر اعلی مایاوتی نے ہلاک ہونے والے لواحقین کو دو دو لاکھ روپے اور زخمیوں کو پچاس ہزار روپے معاوضہ دینے کا اعلان کیا ہے۔ وزیر اعظم منموہن سنگھ نے بھی مرکزی حکومت کی طرف مہلوکین کے وارثاء کو ایک لاکھ اور زخیموں کو پچاس ہزار روپے دینے کا اعلان کیا ہے۔

ان تمام دھماکوں میں سائیکلوں کا استعمال کیا گیا ہے اور بم بیگوں میں رکھے ہوئے تھے۔ لکھنؤ میں بی بی سی کے نامہ نگار رام دت ترپاٹھی نے بتایا ہے کہ تقریبا سوا ایک بجے دن میں ایک پرائیویٹ ٹی وی چینل انڈیا ٹی وی کو ایک گمنام ای میل موصول ہوئی تھی جس میں دھماکوں کی دھمکی دی گئی تھی۔