شکیل اختر بی بی سی ، اردو ڈاٹ کام، دلی

	تہلکہ کی رپورٹ کے بعد فسادات میں مودی حکومت کے کرادار کی تفتیش کا مطالبہ زور پکڑ رہاہے۔

پریس کو جاری کیے گئے ایک بیان میں مطالبہ کیا گیا ہے کہ تہلکہ کی خفیہ ریکارڈنگ میں جن افراد کو اعتراف جرم کرتے ہوئے دکھایا گیا ہے انہیں فوراً گرفتارکیا جائے۔

اس میں کہا گیا ہے کہ سپریم کورٹ خصوصی تحقیقاتی ٹیم تشکیل دے سکتی ہے جوگجرات کے 2002 کے فسادات میں وزیر اعلی نریندر مودی اور ان کی انتظامیہ کے اعلی افسران اور پولیس اہلکاروں کے کردار کی جانچ کر سکتی ہے۔

دانشوروں نے کہا ہے اگر یہ کمیٹی تشکیل دی گئی تو ’یہ ہندوستان کی تاریخ کی ایک اہم تحقیقیاتی کمیٹی ثابت ہو گی۔‘

بیان میں کہا گیا ہے کہ تہلکہ کے سٹنگ آپریشن سے ثابت ہو گیا ہے کہ گجرات کے فسادات نہ تو ’ فوری ردعمل ‘ تھے اور نہ ہی’ فساد‘ بلکہ یہ ایک ’منظم قتل عام ، لوٹ اور غارت گری تھی۔‘

	فسادات میں سینکڑوں مسلمان مارے گئے۔

بیان پر دستخط کرنے والوں میں متعدد سماجی کارکنوں اور صحافیوں کے علاوہ معروف مصنفہ ارون دھتی رائے، نرمدا اندولن کی میدھا پاٹکر ، سابق وزیر قانون شانتی بھوشن ، سابق خارجہ سکریٹری مچکند دوبے ،سرکردہ وکیل کامنی جیسوال اور بحریہ کے سابق سربراہ ایڈمرل آر ایچ تاہلیانی شامل ہیں۔

اس دوران ریلوے کے وزیر لالو پرساد یادو نے وزیر اعظم سے مسٹر نریندر مودی کی گرفتاری کا مطالبہ کیا ہے ۔

بدھ کے روز مسٹر یادو نے اپنی پارٹی کے سینیئر رہنماؤں کے ایک وفد کے ساتھ وزیر اعظم منموہن سنگھ سے ملاقات کی اور ان سے کہا کہ تہلکہ کے ٹیپ مسٹر مودی کی گرفتاری کے لیے کافی ہیں ۔

’تہلکہ کی خفیہ ریکاڈنگ نے گجرات کے فسادات میں ریاستی حکومت کے ملوث ہونے کی بات پوری طرح ثابت کر دی ہے۔‘

مسٹر یادو نے بی جے پی کے اعلی رہنما ایل کے اڈوانی کے خلاف بھی کارروائی کرنے کی مانگ کی جو بقول ان کے مسٹر مودی کی پشت پناہی کر رہے ہیں ۔

مسٹر یادو نے کہا کہ جو حقائق تہلکہ کی تفتیشی رپورٹ سے سامنے آئے ہیں، ان کے بارے وہ ایک عرصے سے کہتے رہے ہیں ۔