رام دت ترپاٹھی بی بی سی، لکھنؤ

	زمین کھسکنے سے متاثرہ علاقوں میں کئی مکان بھی گرگئے ہیں

زمین کھسکنے کا یہ واقعہ جمعرات کی صبح چین کی سرحد سے متصل پتھوڑا گڈھ ضلع میں پیش آیا ہے۔ نامہ نگاروں کے مطابق خدشہ ہے ہلاکتوں کی تعداد میں اضافہ ہوسکتا ہے کیونکہ کئی افراد ابھی بھی مٹی کےملبے تلے دبے ہوئے ہیں۔

مقامی لوگوں کا کا کہنا ہے کہ بیس افراد لاپتہ ہیں۔ کماؤں علاقے کے انسپکٹر جنرل آف پولیس اجے کمار نے بی بی سی کو بتایا کہ مٹی کھسکنے کا یہ واقعہ تیز بارش کے سبب دھرچولا کے دو دیہاتوں بارم اور سیلدھر میں پیش آیا ہے۔ ان کے مطابق زمین کھسکنے سے متاثرہ علاقوں میں کئی مکان بھی گرگئے ہیں۔

انڈو تبت بارڈر پولیس امدادی کام سرانجام دے رہی ہے۔ کہا جا رہا ہے کہ پولیس نے آٹھ لاشیں برآمد کر لی ہیں۔ ضلعی انتظامیہ امدادی کارروائیوں اور بچاؤ کے کام کا جائزہ لینے کے لیے جائے وقوعہ پر پہنچ گئی ہے۔