انڈیا میں مختلف تنظیمیں تعلیمی اداروں میں پسماندہ ذاتوں کے کوٹے کے خلاف احتجاج کر رہی ہیں

چیف جسٹس کے جی بالا کرشنن کے سربراہی میں قائم سپریم کورٹ بینچ نے بدھ کو کہا ہےکہ اوبی سی ریزرویشن سے متعلق پورے معاملے کی سماعت کے بعد ہی کوئی فیصلہ ممکن ہوگا۔

مرکزي حکومت نے سپریم کورٹ بینچ سے اپیل کی تھی کہ رواں تعلیم سال میں داخلے کا وقت ختم ہورہا ہے اس لیے وہ پسماندہ ذاتوں کے طلبہ کی ریزرویشن کے نفاذ کے لیے کوئي عارضی ہدایت جاری کردے۔

منگل کو اس معاملے پر دن بھر بحث ہوئی اور حکومت نے عدالت کو بتایا تھا کہ وہ ریزرویشن سے او بی سی کے متمول طبقے کو الگ رکھے گی۔ لیکن بینچ نے عارضی ہدایت جاری کرنے سے انکار کرتے ہوئے کہا کہ جب تک پورے معاملے کی سماعت نہيں ہوتی وہ کوئي فیصلہ نہیں دیں گے۔

مرکزی حکومت نے پسماندہ برادریوں کے لیے اعلیٰ تعلیمی اداروں میں ستائیس فیصد نشستیں مخصوص کرنے کا فیصلہ کیا تھا جس پر سپریم کورٹ کی ایک بینچ نے انتیس مارچ کو حکم امتناعی جاری کردیا تھا۔

عدالت کا کہنا تھا کہ پسماندہ ذاتوں کے لیے قابل اعتبار جائزے کی عدم موجودگی میں کوٹہ نافذ نہیں کیا جاسکتا ہے۔ حکومت نے پسماندہ ذاتوں کے لیے سیٹیں مخصوص کرنے کا جو پیمانہ متعین کیا ہے اس کی بنیاد 1931 کی مردم شماری ہے جو اب غیرمستند مانی جاتی ہے۔

مختلف جائزوں کے مطابق ہندوستان کی آبادی میں دلت اور قبائلی ساڑھے 22 فیصد ہیں جبکہ پسماندہ ذاتوں کا تناسب پچاس فیصد سے زیادہ ہے۔

ملک میں اعلی ذات کے ہندوؤں کی تعداد پچیس فیصد سے کم ہے لیکن تعلیمی اداروں اور ملازمتوں میں روایتی طور پر اعلی ذات کے ہندوؤں کا غلبہ رہا ہے۔

تعلیمی اداروں میں پسماندہ ذاتوں کے طلبہ کی نمائندگی بہتر کرنے کے لیے حکومت نے ریزرویشن دینے کا فیصلہ کیا ہے۔تاہم آج کے فیصلے سے مرکزی حکومت کی کوششوں کو دھچکا لگاہے۔