ستائیس منزلہ گھر سے مکمل ممبئی شہر اور سمندر دکھائی دے گا

ساڑھے چار ہزار مربع میٹر کے پلاٹ پر تعمیر کیے جانے والا یہ ستائیس منزلہ گھر جب آئندہ برس مکمل ہو گا تو اس سے سارے ممبئی شہر کا طائرانہ جائزہ لیا جا سکے گا۔

ایک اطلاع کے مطابق مکیش امبانی کے آرکیٹکٹس نے یہ بلندو بالا گھر ڈیزائن کرنے کا فیصلہ مکیش کی’بحیرۂ عرب کا مکمل نظارہ‘ کرنے کی خواہش کے بعد کیا۔

یہ عمارت ایک سو ستّر میٹر بلند ہو گی اور اس میں مکیش امبانی اور ان کے اہلِ خانہ کے علاوہ چھ سو افراد پر مشتمل ان کا عملہ بھی رہائش پذیر ہوگا۔

عمارت کی پہلی چھ منزلیں کار پارکنگ کے لیے مخصوص ہوں گی ساتویں اور آٹھویں منزل پر ایک ہیلتھ کلب تعمیر کیا جائے گا اور اس سے اوپر کی چند منازل پر عملے کے رہائشی فلیٹ ہوں گے۔عمارت کی ایک منزل ’انٹرٹینمنٹ فلور‘ ہو گی جہاں ایک مکمل منی تھیٹر بنایا جائے گا۔

مکیش امبانی اور ان کے اہلِ خانہ اس عمارت کی بالائی منازل پر رہیں گے جہاں ایک ہیلی پیڈ اور سوئمنگ پول بھی تعمیر کیے جائیں گے۔

ناقدین نے ایک ایسے شہر میں اس گھر کی تعمیر کو دولت کی بے جا نمائش قرار دیا ہے جہاں کی نصف سے زائد آبادی فٹ پاتھ پر رہتی ہے۔