دونوں بھائیوں کی شخصیتوں میں بہت فرق ہے

ہندوستان کے سب سے طاقتور صنعتی خاندان کی تقسیم کا اعلان امبانی برادرز کی والدہ نے سنیچر کے روز کیا۔

معاہدے کے مطابق بڑے بھائی مکیش امبانی کو پٹرول اور پیٹروکیمیکل کاروبار پر مکمل اختیار دیا گیا ہے جبکہ ٹیلی کام اور بجلی سے متعلق اثاثے انیل امبانی کے حوالے کیے گئے ہیں۔

ہندوستان کے سب سے بڑے صنعتی گروپ کے کنٹرول پر تنازعہ گزشتہ سال نومبر میں شروع ہوا تھا۔

سنیچر کے روز کوکیلابین نے اعلان کیا کہ انہوں نے اپنے دو بیٹوں مکیش اور انیل کے درمیان جھگڑے کو خوش اسلوبی سے حل کر دیا ہے۔

امبانی گروپ کے بانی دھیرو بھائی امبانی جولائی سن دو ہزار دو کو وفات پا گئے تھے اور ان کی وفات کے بعد ان کے دونوں بیٹوں کے مابین کئی سیکٹروں پر پھیلے ہوئے صنعتی گروپ کے کنٹرول کے لیے جنگ چھڑ گئی تھی۔

دونوں بھائیوں کے مابین جھگڑے کے باوجود رِلائنس انڈسٹریز نے اپریل میں اپنے سالانہ منافع میں سینتالیس فیصد اضافے کا اعلان کیا جو اس سال پچھتر کروڑ روپے رہا۔

کوکیلابین امبانی نے کہا کہ انہیں یقین ہے کہ مکیش اور انیل اپنے والد کی روایات کی سربلندی اور رِلائنس گروپ کے تیس لاکھ سے زائد شیئرہولڈرز کے مفادات کے تحفظ کے لیے کام کریں گے۔

امبانی خاندان رِلائنس کے ایک تہائی کا مالک ہے جو ممبئی سٹاک ایکسچینج کا سولہ فیصد بنتا ہے۔