ایم ایس احمد پٹنہ

	’اضافہ مریضوں میں نہیں بلکہ اعداد و شمار میں ہوا ہے‘

بہار ایڈز کنٹرول سوسائٹی کے جوائنٹ ڈائرکٹر وشال سنگھ نے بی بی سی کو بتایا کہ اپریل سنہ دو ہزار چھ سے اس سال مارچ تک ایچ آئی وی جانچنے کے مراکز پر ایچ آئی وی پازیٹو یا ایڈز کے کل چار ہزار دو سو چون کیس سامنے آئے جبکہ سنہ دو ہزار پانچ اور چھ کے درمیان یہ تعداد دو ہزار سات سو چھیاسی تھی۔

ریاستی ایڈز کنٹرول سوسائٹی نے سینٹینل سرویلنس رپورٹ بھی جاری کی ہے جس کے مطابق ایڈز کے شکار یا ایچ آئی وی پازیٹو لوگوں کی تعداد کچھ نئے علاقوں میں بڑھی ہے اور نیپال کی سرحد سے ملحقہ علاقوں میں سب سے زیادہ اضافہ دیکھا گیا ہے۔

سرکاری اہل کار ایچ آئی وی اور ایڈز کے مریضوں میں اضافے کو تشویش ناک بتا رہے ہیں لیکن اس حوالے سے کام کرنے والے بہت سے افراد کا کہنا ہے کہ اضافہ مریضوں میں نہیں بلکہ اعداد و شمار میں ہوا ہے۔

بہار میں ایڈز کے سلسے میں بیداری مہم چلا رہی تنظیم ’سمیک’ کے اہلکار سنجے دیو کہتے ہیں کہ ایڈز اور ایچ آئی وی پازیٹو کے مریض پہلے بھی بہت تھے مگر حکام اس حقیقت کو تسلیم کرنے سےگریز کرتے تھے۔ ان کا کہنا تھا’دوسری بات یہ بھی ہے کہ بیداری مہم کی وجہ سے لوگ اب تشخیصی مراکز پر پہنچ رہے ہیں جس کے نتیجے میں اعداد و شمار میں اضافہ ہو رہا ہے‘۔

سروے میں مظفر پور ضلع کو سب سے زیادہ متاثرہ قرار دیا گیا ہے۔ مظفر پور کے شری کرشن میڈیکل کالج ہسپتال میں ہی ایڈز کے مریضوں کے لیے ’اینٹی ریٹرو وائرل سنٹر‘ قائم ہے جو ریاست کا دوسرا ایسا مرکز ہے۔

اس مرکز کے ڈاکٹر سنیل کہتے ہیں کہ اس طرح کے اعداد و شمار سے یہ پتہ چلنا مشکل ہوتا ہے کہ ایڈز اور ایچ آئی وی پازیٹو کے معاملے بہار کے رہائشیوں کے ہیں یا ان لوگوں کے ہیں جو بہار سے باہر مزدوری کے لیے جاتے ہیں اور وہاں سے بیماری لے کر لوٹتے ہیں۔

سنجے دیو کہتے ہیں کہ بیداری مہم ان علاقوں میں تیز کرنے کی ضرورت ہے جہاں لوگ بہار چھوڑ کر جاتے ہیں اور سال میں ایک دو بار گھر لوٹتے ہیں۔ ان کے مطابق ایسے لوگ ’غیر محفوظ سیکس’ میں ملوث ہوتے ہیں اور خود ایچ آئی وی کا شکار ہونے کے ساتھ اپنی بیوی اور بچے کو بھی متاثر کرتے ہیں۔