دھماکے کے دو اہم ملزمان گرفتار نہیں ہو سکے

سزا پانے والوں میں رشید عمر الوارے ، شاہجہاں شیخ دھرے اور عباس داؤد شیخ دھرے شامل ہیں۔ یہ تینوں ان کشتیوں کے مالک تھے جن کے ذریعے بم کا سامان سمندر کے راستے ممبئی پہنچایا گیا تھا۔ دو دیگر قصورواروں کے نام جسونت وینکر اور شریف ادھیکاری ہیں جو ماہی گیر ہیں۔

ان پانچوں کو تین تین برس قیر کی سزا کے ساتھ پچیس پچیس ہزار روپے جرمانے کی سزائیں بھی سنائی گئی ہیں۔ جرمانہ ادا نہ کرنے کی صورت میں مزید چھ چھ ماہ قید میں گزارنے ہوں گے۔

اس مقدمے میں سو مجرم ہیں۔ جمعہ کوصرف پانچ کی سزاؤں کا تعین ہواہے۔ باقی پنچانوے قصورواروں کی سزاؤں کافیصلہ آئندہ پیر سے شروع ہو گا۔

بم حملوں میں دو سو ستاون افراد ہلاک اور سات سو سے زیادہ لوگ زخمی ہوئے تھے۔

بم دھماکوں کی وجہ ملک بھر میں ہونے والے مذہبی فسادات بتائے گئے تھے جن میں دو ہزار سے زیادہ لوگ ہلاک ہوئے تھے۔

دھماکوں کی منصوبہ بندی کا الزام داؤد ابراہیم پر لگایا جاتا ہے لیکن وہ گرفتار نہیں ہوئے۔ انڈیا کا کہنا ہے کہ ابراہیم اور مقدمے کے ایک اور اہم ملزم ٹائیگر میمن پاکستان میں روپوش ہیں لیکن پاکستان اس کی تردید کرتا ہے۔

استغاثہ نے چوالیس ملزمان کے لیے سزائے موت کا مطالبہ کیا ہے جن میں میمن کے تین بھائی شامل ہیں۔ ان لوگوں پر منصوبہ بندی اور دھماکہ خیز مواد نصب کرنے کا الزام ہے۔

استغاثہ نے بالی وڈ اداکار سنجے دت سمیت دس دیگر افراد کے لیے بھی انتہائی سزاؤں کا مطالبہ کیا ہے۔