کسی کو بھی جمہوری روایات اور سکیولرزم سے کھیلنے نہيں دیں گے: منموہن سنگھ

پارلیمنٹ کے بجٹ اجلاس میں بحث کے دوران مختلف سوالوں کے جواب میں منموہن سنگھ نے کہا کہ خواہ وہ ماؤ نواز باغیوں کا معاملہ ہو، شمال مشرقی ریاستوں کا یا پھر جموں و کشمیر کے حالات پر نظر ڈالی جائے، موجودہ یو پی اے حکومت کے حالات این ڈی اے کی حکومت سے بہتر ہیں۔

ان کا کہنا تھا ’گجرات میں گودھرا کے واقعہ کے بعد تشدد پھیل گیا تھا لیکن ممبئی کی لوکل ٹرینوں میں ہوئے دھماکوں کے بعد ایسا کچھ بھی نہیں ہوا بلکہ ہزاروں افراد حالات کی بحالی کے عمل میں آگے آئے۔‘

وزیر اعظم نے یہ بھی کہا کہ ملک کے بعض علاقوں سے فرقہ وارانہ تناؤ پیدا کرنے کی کوششوں کی اطلاعات موصول ہوئی ہیں لیکن یو پی اے حکومت کسی کو بھی جمہوری روایات اور سیکولرزم سے کھیلنے نہيں دے گی۔

وزير اعظم منموہن سنگھ نے خطے میں امن اور استحکام کو بھارت کی خارجہ پالیسی کا اہم نکتہ قرار دیتے ہوئے اس بات پر زور دیا کہ پاکستان کے ساتھ بہتر رشتے قائم کرنے کی پوری کوشش کی جا رہی ہے اور اس کے مثبت نتائج بھی نظر آنے لگے ہیں۔ ان کا کہنا تھا کہ پاکستان کے ساتھ تمام مسائل بات چیت کے ذریعے حل کیے جائیں گے۔

ریاست آسام کا ذکر کرتے ہوئے منموہن سنگھ نے کہا کہ بھارت کبھی بھی بھارتیوں سے بات چیت کرنے کے لیے پیچھے نہیں ہٹا ہے لیکن ملک کی یکجہتی کے خلاف کسی کو بھی کام کرنے کی اجازت نہیں دی جائے گی اور معصوم لوگوں کے قاتلوں کوکبھی بھی معاف نہیں جائے گا۔

ملک میں بڑھتی ہوئی مہنگائی پر تشویش ظاہر کرتے ہوئے انہوں نے کہا کہ طلب اور رسد کے درمیان توازن قائم کرنے کی کوشش کی جا رہی ہے اور گزشتہ ہفتے میں مہنگائی میں کچھ کمی نوٹ کی گئی ہے۔