یوپی، گوا اور گجرات کے انتخابات میں کارکن ووٹروں کی بدلتی ہوئی سوچ کا دھیان رکھیں:سونیا

منگل کے روز کانگریس کی پارلیمانی پارٹی کی مجلس مشاورت سے خطاب کرتے ہوئے محترمہ گاندھی نے حال ہی تین ریاستوں میں ہونے والے اسمبلی انتخابات کا ذکر کرتے ہوئے کہا ہے کہ ان انتخابات کے نتائج پارٹی کی امیدوں پر پورے نہیں اترے۔

ان کا کہنا تھا کہ ’یہ ایک تشویش ناک بات ہے کہ پنجاب اور اتراکھنڈ جیسی ریاستوں ميں ترقی کے کئی پروگرام چلانے کے باوجود کانگریس دوبارہ حکومت بنانے ميں کامیاب نہیں ہو ئي‘۔

انہوں نے پارٹی کے کارکنوں سے کہا کہ اب اس شکست کی وجوہات کی تلاش کرنی ہوگی۔ ان کا یہ بھی کہنا تھا کہ پارٹی کی ہار کی ایک وجہ ضروری اشیاء کی قیمتوں میں اضافہ ہو سکتی ہے۔

کانگریس کی صدر سونیا گاندھی نے اپنے خطاب میں بوفورز مقدمے کے بڑے ملزم اطالوی تاجر اتاویو کوتریکی کا تو کوئی ذکر نہيں کیا لیکن اس معاملے کے سبب پارلیمنٹ کی کارروائی میں رخنہ پیدا کرنے پر حزب اختلاف کی جماعت بھارتیہ جنتا پارٹی پر سخت نکتہ چینی کی۔

آئندہ مہینوں ميں ریاست اتر پردیش، گوا اور گجرات میں اسمبلی انتخابات کی طرف اشارہ کرتے ہوئے انہوں نے کانگریس کے کارکنوں سے ووٹروں کے بدلتے ہوئے نظریے اور سوچ کی جانب غور کرنے پر زور دیا۔