خدیجہ عارف بی بی سی اردو ڈاٹ کام، دلی

	مسلمانوں کا مطالبہ تھا کہ جمعہ کی وجہ سے کرفیو میں چار گھنٹے کا وقفہ دیا جائے

ضلعی انتظامیہ کے مطابق کوتوالی، راجگھاٹ اور تیواری پور علاقوں میں دن کے مختلف اوقات میں دو دو گھنٹے کے لیے کرفیو میں وقفہ دیا جائے گا۔ تاہم گورکھ ناتھ میں بدستور مکمل طور پر کرفیو رہے گا۔

گورکھپور میں گزشتہ سنیچر کو ہونے والے ہندو مسلم فسادات کے بعد کرفیو نافذ کیا گیا تھا۔ مقامی صحافی کمار ہرش نے بی بی سی کو بتایا کہ کشیدگی میں اب کمی آ رہی ہے اور حالات دھیرے دھیرے معمول پر آرہے ہیں۔

ان کے مطابق مسلمانوں کا مطالبہ تھا جمعہ کی وجہ سے کرفیو میں دن کے بارہ بجے سے لیکر شام چار بجے تک رعایت دی جائے، لیکن انتظامیہ نے صورتحال کے پیش نظر ان کا مطالبہ نہیں مانا اور مختلف علاقوں میں مختلف اوقات میں کرفیو میں نرمی کرنے کا فیصلہ کیا ہے۔

جمعرات کو داخلی امور کے وزیر مملکت شری پرکاش جیسوال صورتحال کا جائزہ لینے کے لیے گورکھپور گئے تھے، لیکن مقامی انتظامیہ نے انہیں شہر جانے کی اجازت نہیں دی۔ نتیجتاً انہیں ہوائی اڈے سے ہی واپس لوٹنا پڑا۔

ایک بیان میں انہوں نہ کہا کہ اگر ملائم سنگھ یادو کی ریاستی سرکار فسادات پر قابو پانے میں ناکام رہتی ہے ’تو مرکزی حکومت بہت دیر تک انتظار نہیں کرے گی اور مسئلہ کے حل کے لیے خود ضروری اقدامات اٹھائے گی‘۔

ان کا کہنا تھا کہ مقامی انتظامیہ فسادات پر قابو پانے میں ناکام رہی ہے۔

دوسری طرف ریاست کے وزیر اعلیٰ ملائم سنگھ یادو نےکہا کہ مرکزی حکومت فسادات پر سیا ست کر رہی ہے اور سیاسی فائدہ اٹھانے کی کوشش کر رہی ہے۔