گورکھ پور میں اس سے پہلے بھی فسادات ہوئے ہیں

بھارتیہ جنتا پارٹی کے ایک مقامی رہنما یوگی ادیتہ ناتھ کی گرفتاری کے بعد پیر کی صبح پھر تشدد بھڑک اٹھا۔اس سے قبل جمعہ کومحرم کے جلوس کے دوران بھی تشدد ہوا تھا۔

یوگی ناتھ کے حامیوں نےگرفتاری کےخلاف احتجاجی مظاہرے کیے جس کے دوران تشدد کے سبب شہر کے بعض علاقوں میں کرفیو نافذ کرنا پڑا ہے۔ مظاہرین کو منتشر کر نے کے لیے پولیس نے لاٹھی کا بھی استعمال کیا ہے۔

مسٹر ناتھ کو اتوار کی رات اس وقت گرفتار کیا گیا تھا جب وہ کشیدگی والے علاقے میں جانے کی کوشش کر رہے تھے۔ انہیں ان کے ایک سو پچاس حامیوں کے ساتھ جیل بھیج دیا گياہے۔

مقامی پولیس اہلکار پی کے اگروال نے خبر رساں ایجنسی پی ٹی آئی کو بتایاہے کہ ضلع کے چار علاقوں میں کرفیو نافذ کیا گيا ہے۔

اس درمیان ریاست کے ایڈیشنل ڈائرکٹرجنرل آف پولیس گورکھپور پہنچے ہیں۔ انہوں نے کہاہے کہ حالات پر سختی سے نظر رکھی جارہی ہے۔

ان کا کہنا ہے کہ محرم کا جلوس امن کے ساتھ نکا لا جائےگا لیکن کشیدگی والے علاقوں سے جلوس کونکالنے کی اجازت نہیں ہوگی۔

شہر میں کشیدگی کے سبب ضلعی انتظامیہ نے تیس جنوری تک سکول کو بند کرنے کا حکم دیا ہے۔

گزشتہ جمعہ کوگورکھپور میں فرقہ وارانہ تصادم اس وقت شروع ہوا جب اسماعیل پور میں ایک ہندو خاندان کے جلسے میں ناچ گانا جاری تھا۔ اسی دوران دو گروہ آپس میں جھگڑ پڑے۔ ایک گروہ وہاں سے بھاگ رہا تھا کہ دوسرے نےگولی چلا دی۔

اس وقت سامنے سے مسلمانوں کا محرّم کا جلوس آ رہا تھا اور فائرنگ کے کچھ چھرّے جلوس میں شامل لوگوں کو بھی لگ گئے تھے۔ اس کے بعد جلوس کے لوگوں نے مبینہ طور پر حملہ کر کے راج کمار اگرہری نامی ایک نوجوان کو ہلاک کر دیا تھا۔