نوئیڈا میں عورتوں اور بچوں کی ہڈیوں کے ڈھانچے برآمد ہوئے تھے

گزشتہ روز نوئیڈا کیس کے اہم ملزمان منندر سنگھ پنڈرھار اور سرندر کوہلی کے ’تجزیاتی ٹیسٹ‘ اور ’جھوٹ پکڑنے والے ٹیسٹ‘ گجرات کے شہر احمد آباد میں مکمل کر لیے گئے تھے۔

ٹیسٹ مکمل ہونے کے بعد انہیں نوئیڈا کے لیے روانہ کیا جانا تھا لیکن سرکاری وکیل نے نوئیڈا کی ایک عدالت کو بتایا کہ ملزمان کے احمدآباد میں بعض ٹیسٹ کیے گئے ہیں لیکن وہ ابھی نوئیڈا نہیں پہنچے ہیں۔ ملزمان کو بدھ کو نو‏ئیڈا کی عدالت میں پیش نہیں کیا جاسکا۔ عدالت نے ملزمان کی پولیس ریمانڈ کی مدت ان کی غیر موجودگی میں بڑھائی ہے۔

	وہ نالہ جہاں سے بچوں اور خواتین کی ہڈیاں برآمد ہوئی تھیں

دریں اثنا نوئیڈا کی بار ایسوسی ایشن نے ملزمان کا دفاع نہ کرنے کا فیصلہ کیا ہے۔ تنظیم کا کہنا ہےکہ ملزمان نے ایسا جرم کیا ہے جس کا دفاع نہیں کیا جاسکتا۔

بار ایسوسی ایشن کے اس فیصلے کے بعد یہ بحث چھڑ گئی ہے کہ کسی بھی دوسرے شہری کی طرح نوئیڈا کیس کے ملزمان کو بھی عدالت کے سامنے اپنا دفاع کرنے کا حق ہے۔

منگل کو ملزم مونندر سنگھ کا ’نار کو انیلسز ٹیسٹ‘ کیا گیا جو چھ گھنٹے تک جاری رہا جبکہ پیر کو دوسرے ملزم سریندر کوہلی کے ٹیسٹ انجام دیے گئے تھے۔

معائنے کا یہ عمل پانچ دن تک جاری رہا اور اس دوران ملزمان کے طبی معائنے کے علاوہ ان پر ’نارکو انیلسز‘، ’برین میپنگ‘ اور ’پولی گرافک ٹیسٹ‘ بھی کیے گئے۔

	پولیس نے منندر سنگھ پنڈھار کو قتل اور اغواء کے کیس میں گرفتار کیا تھا

لیبارٹری کے ڈپٹی ڈائریکٹر ڈاکٹر ایس ایل وایا کے مطابق انہیں امید ہے کہ ٹیسٹوں کے دوران حاصل کردہ معلومات سے ان کی ٹیم کسی نتیجے پر پہنچے میں کامیاب ہو جائے گی۔ ان کا کہنا تھا کہ معائنے کے دوران تفتیشی ایجنسی کے ساتھ ساتھ ملزمان کے نقطۂ نظر کو بھی پوری اہمیت دی گئی۔

نتائج کے حوالے سے انہوں نے بتایا کہ ٹیسٹ سے حاصل کردہ مکمل معلومات سے نتائج اخذ کرنے میں ابھی کئی روز لگیں گے۔ اس قسم کے ٹیسٹوں کے نتائج کو بھارتی قانون بطور ثبوت منظور نہیں کرتا تاہم اس قسم کے ٹیسٹ تحقیقات میں مدد کے لیے کیے جاتے ہیں۔

دلی سے متصل نوئیڈا کی مختلف جگہوں سے دسمبر میں عورتوں اور بچوں کی ہڈیوں کے ڈھانچے برآمد ہوئے تھے۔ نتھاڑی گاؤں سےگزشتہ 21 مہینوں میں 3 سے 11 سال کی عمر کے تقریبا تیس بچے لاپتہ ہیں۔