ایم ایس احمد پٹنہ

	پولیس کا کہنا ہے کہ وہ اس کیس میں آزادانہ کارروائی کرے گی

ریاست کے ویجیلنس بیورو نے مدھے پورا کے ضلع مجسٹریٹ ہیم چندر جھا کو انکی لال بتی والی گاڑی سے ریاست بہار کے دارالحکومت پٹنہ میں گرفتار کر لیا ہے۔ دلچسپ بات یہ ہے کہ ڈی ایم صاحب ’سپیڈی کرمنل جسٹس‘ کے موضوع پر منعقدہ ایک سیمینار میں شمولیت کے لیئے پٹنہ آئے ہوئے تھے۔

ویجیلنس بیورو کے اے ڈی جی نیل منی کے مطابق چندر جھا کی ضبط شدہ گاڑی میں رکھے ایک بیگ سے تقریباً دو لاکھ روپے برآمد ہوئے ہیں۔ اس کے علاوہ انکی جیبوں سے بھی پچاس ہزار روپے ملے ہیں۔

اس سلسلے میں ریاست کے چیف سیکریٹری اے کے چودھری کا کہنا ہے کہ پولیس آزادانہ طور پر کارروائی کرےگی اور حکومت پولیس کی رپورٹ کی بنیاد پر ہی کوئی ایکشن لے گی۔

ویجیلنس بیورو کے ذرائع کا کہنا ہے کہ انہیں یہ اطلاع ملی تھی کہ ہیم چندر اپنے ضلع کے بعض جونیئر افسران سے ’سلامی‘ کے پیسے لینے والے ہیں۔ ان ذرائع کے مطابق جب اس بات کی تصدیق ہوگئی کہ ’ لین دین‘ ہو گئی ہے تو مسٹر جھا کی گاڑی روک کر تلاشی لی گئی۔

مسٹر جھا بہار پبلک سروس کمیشن سے ترقی حاصل کر کے انڈین ایڈمنسٹریشن سروس یا آئ اے ایس کے لیۓ منتخب ہو ئے تھے۔ ریاست میں ضلع کے سب سے سینیئر افسر کی گرفتاری تمام اخباروں کی شہ سرخی بنی ہے اور ٹی وی چینلز میں بھی اس کا خوب چرچا ہے۔

اس سے قبل ایک اور آئی اے ایس افسرگوتم گوسوامی پرسیلاب زدگان کی مدد کے لیئے مختص رقم میں گھپلے کا الزام لگایا گیا تھا۔ گوسوامی کئی ماہ جیل میں رہنے کے بعد آجکل ضمانت پر رہا ہیں۔ گوتم گوسوامی کو عالمی شہرت یافتہ میگزین ’ ٹائم‘ نے ایشیا کے ہیرو کے طور پر منتخب کیا تھا۔