ایم ایس احمد
پٹنہ |  |
| | | مظفرپور میں ایک نالے سے پولیتھین کی تھیلی میں بند ایک ساتھ تین بچوں کی لاشیں ملیں |
نوزائیدہ بچوں کا زندہ یا مردہ کسی کچرے کے ڈھیر پر ملنا بہار میں کوئی خاص بات تصور نہیں کی جا تی ہے۔ بچہ اگر زندہ رہے تو کسی لاولد کی زندگی خوشیوں سے بھر دیتا ہے اور اگر مردہ ملے تو پوسٹ مارٹم کے لیۓ ہسپتال کے حوالے کر دیا جاتا ہے۔ نوزائیدہ بچوں کو اس طرح پھینکنے والوں کا با آسانی پتہ نہیں چلتا لیکن جمعرات کو ریاست کے شمالی شہر مظفرپور میں ایک نالے سے پولیتھین کی تھیلی میں بند ایک ساتھ تین بچوں کی لاشیں ملیں تو اس گورکھ دھندے کا بھانڈا پھوٹا۔ ان نوزائیدہ بچوں کو نالےمیں پھینک کر بھاگ رہے ہسپتال کے ایک صفائی ملازم پر مقامی لوگوں کی نظر پڑ گئی۔ اس نے بتایا کہ وہ ایک بچے کو پھینکنے کے لیے بیس روپے وصول کرتا ہے۔ ارجن ملک نام کے اس صفائی مزدور نے بتایا کہ وہ دو برس سے یہ کام کر رہا ہے۔ ارجن نے جس ہسپتال سے لاکر ان بچوں کو نالے میں پھینکا تھا وہ شہر کا مشہور میٹرنٹی سنٹر ہے۔ مقامی انتظامیہ نے ارجن کے پکڑے جانے کے بعد مذکورہ ہسپتال کے منتظمین کے خلاف جنین کشی کی ایف آئی آر درج کی ہے۔ ضلع مجسٹریٹ وجۓ کمار نے اعلان کیا ہے کہ اگر پوسٹ مارٹم رپورٹ میں بچوں کی موت قدرتی طریقے سے نہ ہونے کی تصدیق ہوگئی تو سخت قانونی کارروائی کی جائے گی۔ ادھر ہسپتال کے ایک سینئر اہلکار وی وی گری کا کہنا ہے کہ زچگی کے دوران کئی بار خاندان والے بچوں کو ہسپتال میں ہی چھوڑ جاتے ہیں اور ان بچوں کو دفن کرنے کے لیۓ صفائی مزدور کو بیس روپے دیۓ جاتے ہیں۔ مسٹر گری کا کہنا ہے کہ انہوں نے مقامی حکام سے کئی بار ایسے بچوں کو دفنانے کے لیۓ زمین کا مطالبہ کیا ہے لیکن انہیں زمین فراہم نہیں کی گئی ایسے میں یہ صفائی مزدور پر منحصر ہے کہ وہ بچوں کو کہاں دفناتا ہے۔ شہر کے مشہور ماہر اطفال ڈاکٹر برج موہن اس معاملے کو بدلتے معاشرتی حالات میں دیکھنے کی بات کہتے ہیں۔ انکا کہنا ہے کہ چوری چھپے قائم کۓ گۓ جنسی تعلقات کی وجہ سے اسقاط حمل کے واقعات میں کافی اضافہ ہوا ہے۔ ڈاکٹر برج موہن کے مطابق اسقاط حمل اگر ابتدائی دنوں میں ہو جائے تو پتہ نہیں چلتا لیکن جنین جب واضح شکل اختیار کر لیں تو انہیں زچگی کے بعد کہیں نہ کہیں پھینک دیا جاتا ہے۔ انکا کہنا ہے کہ کئی بار ایسا بھی ہوتا ہے کہ بچے کو اسکی جنسی شناخت کے بعد پھینکا جاتا ہے۔ | 
دیر ہو گی تو لڑکا ہو گا
