صلاح الدین بی بی سی اردو ڈاٹ کام، دلی

	اشوک سنگھل اکثر اسلام اور عیسائیت کے خلاف بیان دیتے رہے ہیں

وی ایچ پی کے صدر اشوک سنگھل نے کہاکہ چونکہ دونوں ہی مذاہب دنیا پر اپنا دبدبہ قائم کرنے کی کوشش میں ہیں اس لیئے یہ لڑائی ایک اور عالمی جنگ کا پیش خیمہ ثابت ہوسکتی ہے۔

دلی میں ایک پریس کانفرنس کے دوران وی ایچ پی کے صدر اشوک سنگھل نے کہا کہ’ عیسائی اور مسلمان دونوں ہی ہندو مذہب کے دشمن ہیں اس لیئے بھگوان نے انکے لیئےلڑنے مرنے کے لیئےراستے کھول دیۓ ہیں۔‘

انکا کہنا تھا کہ یورپ میں اسلام بہت تیزی سے پھیل رہا ہے اس لیئےاگر مسیحی اس طرح کی باتیں نہیں کریں گے تو پھر اسلام کو روکا نہیں جاسکتا۔’چونکہ یہ دونوں ہی جارحیت پسند مذہب ہیں اور دنیا پر اپنا دبد بہ قائم کرنا چاہتے ہیں اس لیئےلڑائی اور بڑھے گی۔ ایک مکہّ پر حملہ کریگا اور دوسرا ویٹیکن پر ، دونوں کو لڑنے دیجیئے ہم دیکھتے رہیں گے۔‘

حسب معمول اشوک شنگھل نے ملک کے مسلمانوں پرشدید نکتہ چینی کی اور کہا کہ وہ بھارت کو بھی اسلامی ملک بنانا چاہتے ہیں تااہم وہ پوپ کے بیان سے بھی متفق نہیں ہیں۔
’ پوپ سے ہمارے بہت اختلاف ہیں۔ ہم انکے بیان سے کیوں متفق ہوں گے جب وہ ہمارے سینے پر چڑھ کر ہم سے کہتے ہیں کہ ہم تمہیں بھی عیسائی بنا دیں گے۔‘

انکا کہنا تھا کہ عیسائی مشنری ادارے پیسوں کا لالچ دیکر ہندوؤں کا مذہب تبدیل کرانے کی کوشش کر رہی ہیں۔

وی ایچ پی نے یہ پریس کانفرنس ایودھیا میں بابری مسجد کے مقام پر رام مندر کی تعمیر کے لیئےنئی مہم اور اپنی یاتراؤں کے اعلان کے لیئےبلائی تھی۔ تنظیم نے رام مندر کی تعمیر کے لیئےنئے منصوبوں کا اعلان کیا ہے جسکے تحت سادھو پورے ملک میں یاترائیں نکالیں گے۔

تجزیہ کار کہتے ہیں کہ یو پی میں اسمبلی انتخابات ہونے والے ہیں اور بھارتیہ جنتا پارٹی کی انتخابی مہم میں مدد کے لیئےوی ایچ پی نے اپنی در پردہ کوششیں شروع کردی ہیں۔