شکیل اختر بی بی سی ارو ڈاٹ کام ، دلی

	دیہاتیوں نے ماؤ نواز باغیوں کے خلاف ملیشیا میں شمولیت اختیار کی ہے

ابتدائی اطلاعات کے مطابق اتوار کی شب ہونے والے اس حملے میں تئیس سے زیادہ لوگ زخمی بھی ہوئے ہیں۔

پولیس حکام کا کہنا ہے کہ ہلاکتوں اور زخمیوں کی تعداد زیادہ بھی ہو سکتی ہے۔حکام کے مطابق یہ حملہ ماؤ نواز باغیوں نے اس ریلیف کیمپ پر کیا جہاں مقامی گاؤں کے باشندے ماؤ مخالف سرکاری مہم میں حصہ لے رہے تھے۔شدت پسندوں نے تقریباً سو کیمپوں کو نذرِ آتش بھی کر دیا۔

اس ریلیف کیمپ کے نزدیک ہی سنٹرل ریزرو پولیس کا بھی ایک کیمپ واقع ہے۔ باغیوں نے سکیورٹی فورسز کو الجھائے رکھنے کے لیئے پہلے پولیس کیمپ پر حملہ کیا اور اس کے بعد ریلیف کیمپ پر اندھا دھند فائرنگ شروع کر دی اور بم دھما کے کیئے۔ حملے کی بعد ماؤ نواز باغی قریبی جنگلوں میں فرار ہوگئے۔

حکام نے بتایا ہے کہ باغیوں نے تئیس سے زیادہ دیہاتیوں کر اغواء بھی کر لیا ہے۔ دنتے واڑہ کے ضلع کلکٹر کے آر پسڈہ نے بتایا ہے کہ نیم فوجی دستے مغوی افراد کی بازیابی کے لیئے پورے علاقے کی تلاشی لے رہے ہیں۔ تاہم مسٹر پسڈا نے اندیشہ ظاہر کرتے ہوئے کہا کہ’مجھے خدشہ ہے کہ کہیں اغواء کیئے گئے لوگوں کو ہلاک نہ کر دیا گیا ہو کیونکہ ماؤ نواز اکثر یہی کرتے ہیں‘۔

یاد رہے کہ دانتے واڈہ میں پہلے بھی نکسلی حملے ہو تے رہے ہیں۔