ریحانہ بستی والا بی بی سی اردو ڈاٹ کام ، ممبئی

	ایڈیشنل پولیس کمشنر کا کہنا ہے کہ کسی فرقہ کو بد دل ہونے کی ضرورت نہیں کیونکہ یہ تفتیش کا حصہ ہے ۔

انسداد دہشت گردی کے عملہ کے ایک سینئر افسر کے مطابق وہ اس زاویے سے بھی تفتیش کر رہے ہیں کہ کہیں اس میں بنگلہ دیشی شدت پسند ذبیح الدین انصاری کا ہاتھ تو نہیں ہے ۔انہیں اس بات کا یقین ہے کہ ٹرینوں میں دھماکوں کے لیئے شدت پسند ممبئی میں غیر قانونی طور پر داخل ہوئے یا پھر انہیں بنگلہ دیش میں تربیت ملی اور ان کی مدد ممبئی کے مقامی بنگلہ دیشیوں نے کی۔

ایک افسر کا دعویٰ ہے کہ اورنگ آباد میں دھماکہ خیز مواد برآمد ہونے کے بعد ذبیح الدین چوبیس پرگنہ کے ذریعہ بنگلہ دیش فرار ہو چکا تھے لیکن اس کے بعد سے وہ یہاں کے مقامی لوگوں سے رابطے میں تھے۔

پولیس کے اعلی افسران کی جانب سے مسلم اکثریتی علاقوں پر سخت نظر رکھنے کی ہدایت دی گئی ہے خاص طور ملاڈ اور ماہم پر کیونکہ آئی بی کے مطابق ان علاقوں سے بم دھماکوں کے بعد افغانستان اور پاکستان فون کیئے گئے تھے۔ ان علاقوں میں زبردست تفتیشی آپریشن بھی جاری ہے۔

جمعہ کو رات گئے پولیس نے ڈھائی سو کے قریب افراد کو تفتیش کے لئے حراست میں لیا تھا لیکن پھر تفتیش کے بعد انہیں چھوڑ دیا گیا اور صرف مجرمانہ ریکارڈ رکھنے والوں کو ہی حراست میں رکھا گیا ہے ۔ ملاڈ میں پولیس نے دو روز قبل جن ڈھائی سو افراد کو تھانےمیں تفتیش کے لئے بلایا تھا، پولیس کو شبہ تھا کہ ان میں سے دو سو کے قریب بنگلہ دیشی ہیں۔

ممبئی کے مسلمانوں میں شہر کے صرف مسلم علاقوں میں ہی تلاشی پر غصہ پایا جاتا ہے ۔ ان کا الزام ہے کہ پولیس یہ بات تسلیم کر کے چل رہی ہے کہ یہ دھماکے مسلم تنظیموں نے ہی کیئے ہیں۔ مسلم عمائدین کے ایک وفد نے اس سلسلہ میں وزیر اعلیٰ ولاس راؤ دیش مکھ سے ملاقات کی ہے اور وزیر اعلیٰ نے انہیں یقین دلایا کہ بےگناہ لوگوں کو نہیں ستایا جائےگا۔

ایڈیشنل پولیس کمشنر بپن بہاری کا کہنا تھا کہ صرف ملاڈ اور ماہم ہی نہیں پولیس شہر کے کئی مقامات پر آپریشن کر رہی ہے اور اس سے کسی فرقہ کو بد دل ہونے کی ضرورت نہیں کیونکہ یہ تفتیش کا حصہ ہے ۔